Shillong, Jylliew 29
U MLA ka BJP na Pynthorumkhrah, u Bah A.L. Hek ha ka Lah Sngi U Blei u la ong ba u Myntri Rangbahduh ka ri, u Narendra Modi u ju phah ïa ki bun ngut ki Myntri Sorkar Pdeng na ka por sha ka por sha Meghalaya ha ryngkat ki song pynroi, bad mynta ka shong sa ha ka Sorkar Jylla ban pyntikna ba ïa kita ki skhim la pyntreikam ha ka rukom kaba dei.
“Nga kwah ban ai khublei ïa u Myntri Rangbahduh uba la phah ïa bun ngut ki Myntri Sorkar Pdeng sha Meg-halaya ha ryngkat ki song na ka bynta ka roi ka par. Mynta ka dei ka kamram jong ka Sorkar Jylla jong ngi ban pyntreikam ïa kita ki song kiba la phah lyngba ka Sorkar NDA,” ong u Bah Hek haba kren sha ki nongthoh khubor.
Haba kylli shaphang ka jingkam burom jong ka NPP ïa ki skhim ka Sorkar Pdeng, u Bah Hek u la pynskhem ba ka jingsdang jong ki sienjam ka long kaba shai.
“Kano-kano ka seng saiñ pyrthei ka lah ban shim ïa ka burom, hynrei baroh ki tip ba kine baroh ki dei ki skhim kiba wan na u Myntri Rangbahduh ka BJP. U dei u Myntri Rangbahduh jong ka NDA, hooid, hynrei u dei na ka BJP. Kumta kaei-kaei kaba la leh ka dei namar ka jingkyrkhu jong ka BJP ha ka Sorkar Pdeng,” u la ong.
U Bah Hek u la ban jur ba ka jingpyntreikam ka shong ha ki tnad treikam ba dei khmih jong ka Jylla.
“Lada ka skhim ka wan na ka tnad PWD, ka tnad PWD ka don la ka jong ka rukom ban pyntrei ïa ka kam. Haba phai sha ka tnad ka koit ka khiah, ka tnad ka koit ka khiah ka don la ka jong ka rukom ban pyntreikam ïa ka,” u la batai.
U la bynrap, “Lada ka Sorkar Pdeng ka phah ïa ka song sha ka tnad PWD, ngi la aiti ha ka tnad PWD ban leh ïa kaba donkam ban pyntikna ba baroh ki skhim na ka Sorkar Pdeng kin poi sha ki paidbah. Ha ka tnad ka koit ka khiah, ka dei ka kamram jong u Myntri ka koit ka khiah bad ka tnad ban pyntreikam ïa ka skhim khnang ba kan poi sha ki paidbah.”
“Ngi sngewkhia halor ki skhim bapher-bapher ba la phah da ka Sorkar Pdeng. Ka dei ka kamram bad ka jingkitkhlieh jong ka Sorkar Jylla ban pyntreikam ïa kine ki skhim bad ban pyntikna ba kin poi sha ki paidbah,” la ong u Bah Hek. Haba kyntait ïa ki jingai jingmut ba ka jingtuid jong ka jingïarap na ka Sorkar Pdeng ka don jingïadei bad ka ilekshon, u Bah Hek u la ong, “Kam don jingïadei eiei bad ka ilekshon. Kata ka dei ka roi ka par. Ka roi ka par ka jia ha kano-kano ka por. Ngi ïohi ïa shibun ki kam pynroi kiba wan sha Meghalaya, khamtam ha ki kam jngohkai pyrthei, ki kam ïalehkai bad ka koit ka khiah.”
Une u nongïalam ka BJP u la kdew ruh ba ka seng jong u ka dang ïai bteng ban pan jingkyrshan shuh-shuh na ka Sorkar Pdeng.
“Ngi la kyrpad ruh ïa ka Sorkar Pdeng hapoh ka jingïalam jong u Myntri Rangbahduh ban phah katba lah. Ki la leh ïa kane da kaba phah ter ïa ki Myntri Sorkar Pdeng ha ryngkat ki song sha Meghalaya na ka bynta ban kyntiew ïa ka Jylla jong ngi. Na ka liang ka seng ruh, ngi buddien ïa kane kajuh ka mat na ka bynta ka roi ka par ha baroh ki liang jong ka Meghalaya,” u la ong.
