Tura, Nailur:
Ki pulit ka thanat Dalu ha West Garo Hills ki la ïoh kem ïa saw ngut ki nong Bangladesh kiba la wan sha shiliang u khappud ha ka shnong Dalugao ha ka Lah Sngi U Blei.
Haba ki pulit ki la tohkit ïa ki, kitei saw ngut ki la kam ba ki la don ha lynti ban leit sha Malda kaba don ha ka jylla West Bengal.
“Kitei baroh saw ngut ki la don ki Aadhaar Card hynrei ym kiwei pat ki kot ki sla kiba biang ban pynithuh ïa ki. Ki la kam ruh ba ki trei ki ktah ha Chennai,” la ong ka khubor na ki pulit.
Na kitei ki saw ngut, ki pulit ki la ïoh kurup ïa ka pisa India kaba T. 5,000, lai tylli ki Mobile Phone bad kawei ka PAN Card.
Ïa kitei ki saw ngut la ithuh kyrteng kum u Mohamed Mamun Rashid (25), Md. Wasikul (20), Md. Mir Kasim (20) na Chapainawabganj distrik, bad u Siyam Sheik (21) na Rajsai distrik. Ki pulit ki la ong ba kine ki la shah kem hapoh ka kyndon 14 jong ka Foreigners Act.
