Shillong, Nailur 21
Ar ngut ki briew kiba la suba jur ba ki donkti ban pynïap ïa uwei u rangbah ba la 36 snem ha Laitkor, ki la shah kem noh ha ki pulit jong ka East Khasi Hills tang hapoh ki 48 kynta.
Ha ka kyrwoh khubor ba la pyllait da u Superintendent of Police ka East Khasi Hills u Bah Sylvester Nongtnger u la ong ba kane ka jingjia shah pynïap jong utei u rangbah ka la jia ha ka 19 tarik mynta u bnai. Kumta na ka liang ki pulit mar ïa ïoh jingtip ki la trei shitom bad tang hadien ar sngi la ïoh ban kem noh ïa ki briew ba la suba donkti ha kane ka kam.
Une u briew uba la shah pynïap u dei uba la tip kyrteng kum u William Nongrum na ka shnong Khanduli.
Na ka liang jong u SP haba pyntip kham bniah halor kane ka jingjia, u la ïathuh ba ha ka miet jong ka 19 tarik, ki pulit mar ïa ïoh jingtip ïa ka jingdon jong uwei u briew uba la thiah lyngktar ha madan, ki la leit wut-wut sha katei ka jaka bad lap ïa une u briew uba la thiah hapdeng ka jinglyngkien ka snam hapoh ka pyllaw jong ka karkhana shna kali kaba dei jong u Farid Mukhim ba na Laitkor Mawrie, Lumheh.
Haba ki pulit ki la peit bniah la lap ba ki la don ki dak mong ha une u briew kata na ka bynta ka khlieh bad suba ba u la dep ban ïap. Kumta mar-mar la pyntip noh sha ka kynhun Crime Scene Unit ba kan wan lum ïa ki sakhi na kane ka jaka bad ki la ïoh tam ïa uwei u steering kali ba la suba pyndonkam ha ka jingpynïap bad ruh u bilor umdih bad shiteng bilor ka kyaid na kane ka jaka.
Ïa ka metïap la pynkit noh sha NEIGRIHMS hospital ha ka 20 tarik Nailur bad lyngba ka jingwan jong ki bahaïing la lah ban ithuh noh ïa kane ka metïap.
