Shillong, Nailur 21
U Myntri Rangbah u Conrad K Sangma u la ong ba ka Ïingdorbar Thawaiñ ka Jylla kam pat dei ban mynjur ïa ka ‘resolution’ ban pyrshah ïa ka Uniform Civil Code (UCC) haba ym pat ïohi ïa kaei kaba thoh ne don ha ka UCC.
U Conrad u la pynpaw ïa kane ha Ïingdorbar Thawaiñ ha ka sngi basaw jong ka dorbar synrai haba jubab halor ka jingwanrah ka Congress ïa ka rai (resolution) pyrshah ïa ka jingpyntrei ïa ka UCC kaba la kyrshan lang da ka TMC.
Ïa ka resolution la wanrah da u MLA ka Congress na Mawhati u Bah Charles Marngar.
U Conrad u la kular ba ynda la wanrah ïa ka Bill halor ka UCC bad hadien ba la ïohi ïa ki jingbatai kiba don ha ka Bill, hangta yn sa pyni ïa ka jingpyrshah lyngba ka Ïingdorbar Thawaiñ.
U la ong ba ym dei ban don jingartatien haba ïadei bad kane namar ka Sorkar bad ka Ïingdorbar Thawaiñ kam pdiang lada don kano kano kaba wanrah ban ktah ïa ka riti dustur, jinglong tynrai bad ka niam ka rukom.
Hynrei ïa mynta katba ym pat ïohi ïa ka Bill kum ka Ïingdorbar Thawaiñ kam long kaba dei ban mynjur ïa ka rai (resolution) ban pyrshah ïa ka UCC da kaba shu antad.
Ha ka jingshisha, ki MLA ka Congress bad TMC naduh u Bah Ronnie V Lyngdoh, Dr Mukul Sangma, Charles Pyngrope ki la kyrshan lang ïa kane ka rai (resolution) kaba wanrah da u Bah Charles Marngar bad kyrpad ban mynjur da ka Ïingdorbar Thawaiñ ban pyrshah ïa ka UCC.
Namar ka jingpynshai jong u Myntri Rangbah bad jingkular ba ka Jylla kan pyrshah beit ïa ka UCC ynda la ïoh ïa ka Bill, u MLA ka Congress u la hun bad weng noh ïa ka rai.
