Shillong, Nailur 21
Ka KSU East Jaiñtia Hills District Unit ka pynbna biang ba ka jingïakhih paidbah ba la buh ban pynlong ha ka 25 tarik mynta u bnai kan ïaid beit shakhmat, kata ban thiah hapdeng ka surok NH-6, ha Khliehriat kaba dei ka nongbah jong ka distrik.
Ka jingïakhih kan sdang naduh ka por 10 baje mynstep haduh 4 baje janmiet. Ka seng hadien ka jingïohi lyngba ki lad pathai khubor ba kiba bun ki kynhun seng, ki synjuk bapher bapher kum ki nongkamai sumo, ki nongkamai ñiah taksi bad kiwei ki kloi ban kyrshan ïa ka jingïakhih, ka khot ruh ïa kiwei ki kynhun ban ïasnohkti lang khnang ba ka jingdawa kan pynsngew sha ki shkor ba kyllut ka NHAI bad kumjuh jong ka Sorkar Jylla.
Ka KSU ka la ong ba baroh ki la sngewthuh ba ka jingïakhih hi kam dei ka jingïohnong shimet jongno jongno, hynrei na ka bynta ka jingmyntoi uba bun balang.
Kawei pat ka bynta jong ka jingïakhih ha kane ka sngi, kan sdang naduh ka por 7 baje janmiet haduh ka por 5 baje mynstep. Kumta na ka liang ka seng ka la kyrpad ïa ki nongleit nongwan na ki shnong bad ruh ïa kito kiba wan na kiwei pat ki jylla bad ïaid lyngba kane ka surok ba kin sngewbha ban sangeh kamai bad pynïaid kali.
Ka KSU ka la ong ba kan nym lah ban pynbor ïano ïano ruh hynrei ka buh tang ka jingkyntu ban ai ka jingïatreilang naba ka jingïasnohkti lang kan wanrah ka jingjop ïa kane ka jingïakhih ka seng.
