Shillong, Nailur 22
Ka Khasi Indigenous Foundation ka la pyntip paidbah ba ka Foundation kan sa pynlong ïa ka jingpyni nam ïa ki riam tynrai ïa kaba la tip kum ka Khasi Traditional Show Online ha kaba kito kiba kwah ban ïashimbynta ha katei ka jingïakob ki dei ban riam da ki riam tynrai Khasi-Pnar.
Haba kren sha ki lad pathai khubor, u Director jong ka Khasi Indigenous Foundation, u Bah Niman Shadap u la ong ba kito kiba kwah ban ïashimbynta ki dei ban phah ïa ki kyrteng bad ki video jong ki naduh ka 27 tarik u Nailur 2023 haduh ka 7 tarik u Risaw 2023.
U Bah Shadap u la ong la pdiang sngewbha ïa baroh ki paradoh parasnam kiba don ka mynsiem ban ïashimbynta ha katei ka jingïakob.
Ki nongïashimbynta ki dei ban ïathuh ïa ka kyrteng bapura, ka rta bad ka jaka sah jong ki bad kim donkam ban siew ïa kano-kano ka bai rung bad u la ong ba baroh ki lah ban ïashimbynta ha katei ka jingïakob khlem da duh snem.
U Bah Shadap u la ong ba ki video jong ki nongïashimbynta ki dei ban long tang 3 minit bad ki nongïashimbynta ki lah ban rwai, ban siaw, ban tem, ban shad bad kiwei kiwei kiba ki kwah ryngkat bad ka riam ka beit jong u khun Khasi Khara.
“Haba ki ïashimbynta ki dei ban don ka riam tynrai, kam pher lada ki dei na kano kano ka thaiñ hynrei ki dei ban pyni ïa ka tynrai jong ki,” la ong u Bah Shadap.
Ïa ki video jong ki nongïashimbynta yn sa pyllait paidbah naduh ka 10 tarik u Risaw 2023 ha ka Youtube Channel jong ka Ri Jaiñtia News Channel bad yn bishar ïa kitei ki video lyngba ka jingpeit ïa ki ‘likes’, ki ‘views’ bad ki ‘comments’ tang hapoh 15 sngi naduh ba la pyllait ïa ki.
Ki nongjop ha katei ka jingïakob ha ka nam lahduh kin ïoh ban khur ïa ka song pisa kaba T. 10,000, ba wan ba ar T. 5,000 bad ba lai T. 3,000 bad kine baroh lai ngut ki nongjop kin ïoh ryngkat bad ki ‘momento’.
U Bah Shadap u la kyrpad ïa baroh ki paradoh parasnam ba kin ïashimbynta ha katei ka jingïakob bad u la ong ba lehse ha ki por ban sa wan, ka kynhun kan sa lah ban leh ïa ki prokram kiba kham heh shuh shuh
Shuh shuh u Bah Shadap u la ong ba ka jingpynlong ïa katei la jingïakob ka dei namar ba bun na ki samla ki dei kiba la nang la stad bad ki la wad jingstad kylleng sawdong ka pyrthei tangba ka pyrthei kam ithuh ïa ki ba ki dei ki Khasi bad kumta la pynlong ïa kane ka jingïakob khnang ban tip ba u Khasi u don la ki jong ki riam tynrai.
“Kane ka dei ba ngin pyni ïa la ka sap jong ngi khnang ba kata ka riam tynrai jong ngi kan ïaineh pateng la pateng bad ba ngin pynriewspah ïa ka riti ka dustur ka jong ngi”, la ong u Bah Shadap.
U la ong ruh ba ki nongïashimbynta ki dei ban phah ïa ki video ha u nombar 8131803454, 7641802229, 8974232361.
