Shillong, Nailur 22
Ka Meghalaya High Court ha ka Sngi Thohdieng ka la bthah ïa ka sorkar jylla ba kan pynbiang ïa ki jaka tep, thang briew ba kynthup ïa ka jingbuh ïa ki jaka thang briew ba pyndonkam da ka bording (Electric Crematoria) lada donkam.
Haba bishar ïa kawei ka mukotduma, ka High Court ka la ong ba ïa kane ka mukotduma la shim hadien ba u Chief Justice, u Justice Sanjib Bhattacharjee, u la ïoh pdiang ïa kawei ka shithi ha ka 8 tarik Nailur, 2023 na ka Seng Khasi Hima Mawsynram, Mawsynram Syiemship.
“Ka long kaba donkam ban pynthikna ba kin don ki jaka ym tang ha Shillong hynrei wat shawei ruh ha ki shnong bakongsan ka jylla khnang ba yn lah ban tep lane thang ïa ka met kaba sah jong ki briew ha ka rukom kaba dei. Khamtam, kiba kum kine ki jaka ki dei ban don na ka bynta baroh ki jaitbynriew kiba sah ha ka jylla kynthup ki riewlum; khnang ba yn lah ban pyndep ïa ka jinglehniam bakhatduh ha ka rukom kaba biang,” la ong ka High Court.
Ka jingbishar ïa katei ka mukotduma kan long biang hadien shi taïew. Ka sorkar jylla kan hap ban pyntip sha ka High Court halor ka jingdon ki jaka tep, thang briew ha Shillong, Tura, Jowai, Nongstoiñ bad Nongpoh.
