Shillong, Nailur 22
U MLA ka All India Trinamool Congress (AITC), Dr. Mukul Sangma u la ong ba u Henry Lalremsanga u dei ban phah ïa ka ‘Legal Notice’ sha u Myntri Rangbah ka Jylla, u Conrad K. Sangma.
“Hapoh ïingdorbar, ka jingkren jong nga ka long kaba shai. Ka la long kum ka jingai jingmut ïa u Myntri Rangbah. Dei tang u Myntri Rangbah uba la rah ïa kane shabar jong ka ïingdorbar – u (Henry) dei ban phah ‘Legal Notice’ sha u Myntri Rangbah,” la ong u Dr. Sangma haba kren sha ki lad pathai khubor ha ka Sngi Thohdieng.
Ha kajuh ka por, u la ong ba um kwah ban ong eiei halor katei ka ‘Legal Notice’ ba la phah sha u katba um pat ïohi ïa ka bad bynrap ba kaei kaba u ong hapoh ïingdorbar ka don ha ka rynsan paidbah, watla la weng noh ïa katei ka bynta hadien.
U la ong ba ka jinglong-jingman haba ïadei bad u drok ym tang ha Meghalaya hynrei ha kylleng ka Thaiñ Shatei Lam Mihngi ka la pynphai khmat ïa baroh ba kynthup ïa ki dkhot ka ïingdorbar.
U Dr. Sangma u la kdew ba ha kine ki 5 snem ba la leit, ka la don ka jingkiew kaba jur haba ïadei bad ka jingkhaïi, ha kawei ka liang kaba plie lynti da kaba suk na bynta ki nongpyndonkam.
“Kane ka long ka mat kaba ngi hap pynleit jingmut. Ka dei ka kamram jong ka Sorkar ban peit kumno ngi lah ban buddien ïa baroh kiba ïadon bynta ha ka jingkhaïi,” bynrap u Dr. Sangma.
Kum ban shu kdew hangne, na ka liang ki nongïasaid aiñ jong u Henry ki la dawa na u Dr. Sangma ba u dei ban panmap, ban siew T.20 klur hapoh 7 sngi, bad ban sangeh noh ïa ki jingkynnoh pyrshah ïa u Henry.
Kane ka jingshah dawa bai mynraiñ khmat jong u Dr Mukul ka la wan lyngba ka shithi ba ka phah da ki nongïasaid aiñ jong u Henry, ha kaba la ong ba ka jingkynnoh jong u Dr. Sangma ba u Henry u dei u snar nongkhaïi drok lane uta u ‘Drug Kingpin’, ka dei kaba la pynjah burom bad kaba pynbudnam ïa u Henry.
