Nongstoiñ, Nailur 22
Ka Dorbar Shnong ha Riwiang, West Khasi Hills ha ryngkat ka Hynñiewtrep Youths’ Council (HYC), West Khasi Hills ha ka Sngi Thohdieng ki la leit ban khang noh ïa ka shlem treikam bad ka karkhana saiñ nar ha Riwiang.
Katei ka jingleit khang jong ka Dorbar Shnong bad ka HYC ïa katei ka karkhana ka dei hadien ba kawei ka longkmie ïa kaba la tip kyrteng kum ka Kong Edalin Khardewsaw na ka shnong Rwiang, kaba la don ruh lai ngut ki khun, ka la jah na la shnong naduh ka 16 tarik Nailur. Kumta la suba jur ba kane ka longkmie ka la leit lang bad uwei u bar Jylla uba la la tip kyrteng kum u Mridul Bora uba dei u nongtrei ka karkhana Shakhambari Ferro Alloy Company ha Rwiang.
U Sordar ka shnong Riwiang u Bah A. Dkhar haba kren sha ki lad pathai khubor u la ong ba na ka liang jong ka shnong Riwiang ha ryngkat ki bahaïing jong katei ka longkmie ki la leit ban ujor da ka ejahar ha thanat Nongstoiñ halor katei ka jingjah jong katei ka longkmie ha ryngkat utei u bar jylla naduh katei ka sngi.
La ïathuh ruh ba ka shnong ha ka 20 tarik Nailur ka la leit ïakren bad ki bor pynïaid jong katei ka karkhana ba kin wanlam ïa katei ka longkmie bad ka shnong ka la khang tala noh shwa ïa ka jaka treikam jong katei ka karkhana da ka jingthmu ba katei ka karkhana kan shimkhia ban wad bad wanlam ïa katei ka longkmie. Hynrei ha ka 21 tarik Nailur, ka shlem treikam jong katei ka karkhana ka la plie biang.
Shuh shuh ka shnong ha ryngkat ka HYC mynta ka sngi ki la leit ban khang tala biang ïa katei ka jaka treikam jong ka karkhana ha kaba ki la pynpaw ba katba ki bor pynïaid kim pat lah ban wanlam ïa katei ka longkmie kin bteng ban khang ïa katei ka karkhana.
Haba ïakren pat bad u Manager jong katei ka karkhana u la ong ba na ka liang jong ki ki khlem ïaleh pyrshah hynrei ki ai ka kti kamon kti kadiang bad ki la ïatreilang ruh bad ki bor pynïaid shnong kumjuh bad ka tnad pulit ban wad ïa katei ka longkmie lem bad ïa utei u nongtrei.
U Manager u la ïathuh ruh ba na ka liang jong u ha ryngkat ki pulit na Nongstoiñ bad na Assam ki la leit shaduh sha ka ïing sah utei u nongtrei ha Boko ban wad ïa u lem bad ïa katei ka longkmie hynrei ym shym la lap satia bad haba kylli tohkit na ki bahaïing jong utei u nongtrei la ong ba kim don jingtip satia shano u don.
Shuh shuh u la ong ruh ba katkum ka jingïoh jingtip utei u nongtrei uba la jah ryngkat katei ka longkmie ki dei kiba ïa ithuh ithaw bad la ong ruh ba utei u nongtrei u dei uba nang bha ban kren ïa ka ktien Khasi bad uba don ka jingïadei kaba kham jan bad ki paidbah nongshong shnong la kham slem hynrei ïa ka jingleh bad jingthmu jong u ka karkhana kam don jingtip eiei ruh em.
Ha kaba ïadei bad kane ka jingjah ka longkmie na ka liang jong ki pulit ki dang pynlong ïa ka jingtohkit kaba bniah bad ka jingwad ïa kitei ki arngut ka dang bteng.
