Shillong, Nailur 22
U Chief Executive Member (CEM) ka Khasi Hills Autonomous District Council (KHADC) Bah Pynïaid Sing Syiem u la ong ba ka jingpynkylla biang ïa ka KHAD Administration of Elaka (second amendment) bill 2021 ha ka wat kaba arsien ka long ban pynrung biang ïa ki kyndon ban pynkhlaiñ ïa ki bor shnong khnang ban tip haba wan sah ki briew kiba nabar ka jylla.
Haba ïakren bad u Bah Pynïaid hadien ba la wai ka dorbar kyrpang ka KHADC kaba la long mynta ka sngi u la ïathuh ba ha kane ka jingpynbeit thymmai ïa ki kyndon ha kane ka aiñ Administrative of Elaka ka la jan ïasyriem kum ka Inner Line Permit namar ki dorbar shnong ki la khlaiñ bor ban peitngor ïa ka jingwan ki briew kiba nabar ka jylla.
U la ïathuh ba ha kane ka jingpynbeit thymmai ïa kane ka aiñ la ithuh ïa ki seng samla shnong, ki seng longkmie bad ki dorbar shnong ba ki lah ban pynrung kyrteng man uwei-pa-uwei u nongshong shnong.
Nalor kane, u la ong ba ki trai ïing ki hap ban pyntip sha ki dorbar shnong haba ki ai wai ïa ki briew kiba nabar ka jylla bad kin buh bha ïa ki kyrteng jong ki namar ha kine ki sngi ym shym la don ka aiñ ban ai bor ïa ki.
Shuh shuh u la ong ba lada ïa kane ka jingpynbeit thymmai la mynjur ha ïingdorbar KHADC kan long shisha ka jingai bor ïa ki rangbah shnong ba kin peitngor ïa ka shongsuk shongsaiñ hapoh shnong.
U la ïathuh ba kane ka aiñ kan nym tyngkhuh bad ki aiñ jong ki hima, hynrei kan long salonsar ïa baroh ki hima kiba hap hapoh ka KHADC.
Haba kylli kan don ne em ka jingïatyngkhuh bad ka Village Administration Bill, u Bah Pynïaid u la ong ba ïa ka VAB yn nym ïakren shuh namar ka Sorkar India ka la pan jingshai haduh khatphra tylli ha kane ka aiñ. Kumta ban ïada ïa ka jaidbynriew hap ban pynkhlaiñ noh ïa ki dorbar shnong da kane ka Administrative of Elaka.
Na ka bynta ban wanrah ïa ka jingïaid beit, u la ïathuh ba ka KHADC kan pynkhreh ban ai computer ïa baroh ki hima khnang ba ki dorbar shnong kin ai ïa ki kaiphot sha ki hima bad ki hima kin pynpoi sha ka KHADC.
Ha kane ka sngi sdang ka dorbar kyrpang, u Deputy CEM ka KHADC Bah Pynshngaiñ N Syiem u la ïoh ban wanrah ïa ka Khasi Hills Autonomous District (Administration of Elaka) (Second Amendment) Bill 2023.
