Shillong, Nailur:
Ka BJP Mahila Morcha, Meghalaya Pradesh ha ka Sngi Balang ka la ong ba ka Bharatiya Janata Party (BJP) ka dei ka seng ka bym kular tang ka ktien hynrei kaba pyni ruh da ki kam bad ïa kane la sakhi lyngba ka jingwanrah ïa ka ‘Women’s Reservation Bill’.
“Ngan sdang da kaba ong, khublei shi kat dei Modi ba phi la ai sha ngi ïa ka ‘Women’s Reservation Bill’ (WRB) kum ka kam bakhraw na ka ïingmala bathymmai ka Parliament. Kane ka long kaba sngewtynnad bad ka jingsdang jong ka jingkyrmen, ka sienjam kaba khraw na bynta ki kynthei, hadien ka jingïuh kjat ha u bnai,” la ong ka kyrwoh na ka President ka BJP-Mahila Morcha, Kong S. Pariat.
Ka la ong ruh ba baroh shi katta snem, ki seng saiñ pyrthei ki la ai ka jingkular tang da ka ktien halor ka ‘Women’s Bill’, hynrei ka BJP ka la leh ïa kane.
Ka seng ka la pynsngew ruh ba dei tang u Narendra Modi, u Myntri Rangbahduh ka ri uba mut shisha ïa kaei kaba u kren bad leh ïa kaei kaba u mut.
“Ka BJP bad u Modi ki la ong ban wanrah ïa kane ka ‘Bill’ bad ki la leh ïa kane. Ym tang kane, shen yn sa mynjur ïa kane ka ‘Bill’ ban kan sa long aiñ,” ka la ong.
Shuh shuh ka la bynrap ba dei tang ka BJP kaba ai 33% ka bhah sha ki kynthei bad hapoh ka jingïalam u Myntri Rangbahduh ka ri, u Narendra Modi, dei tang ma ka, ka seng kaba la shim ka jingkitkhlieh ha ka ban pyntreikam ïa ka ‘Women’s Reservation Bill’ bad ka la leh ïa kane.
“Khublei shibun Modi ïa kaei kaba phi la leh na bynta baroh ki kynthei,” ong ka Kong Pariat.
