Shillong, Nailur:
U nongïalam ka liang pyrshah hapoh ka ïingdorbar thawaiñ ka jylla, Bah Ronnie V Lyngdoh uba dei ruh u nongïalam ka seng Congress u la pynpaw ba lada ka All India Congress Committee (AICC) ka la bthah ban ïatreilang bad ka TMC ha ka ilekshon MP Lok Sabha ka hap ban kohnguh.
U la ong ba ka AICC ka dei kawei ka seng kaba donlang ha ka kynhun Indian National Developmental Inclusive Alliance (INDIA) ban ïakhun pyrshah ïa ka sorkar BJP kaba la thmu ban ïuhroit ïa ka synshar paidbah hapoh ka ri.
U la ïathuh ba ki ar tylli ki seng saiñ pyrthei kiba don ha Meghalaya ka dei tang ka seng Congress bad ka TMC, hynrei ïa mynta kim pat ïashong jingïalang namar ki dang ap ïa ka rai na ka jingbthah ka AICC na Delhi.
U la pyntip ruh ba ka Congress na Meghalaya ka dang ap ïa ka rai na ka AICC namar ka kynhun INDIA ka dang shong jingïalang ha kine ki sngi ha Hyderabad bad ha Mumbai.
“Hooid ngi la don lypa u kyrtong jong ngi u Bah Vincent Pala uba dei u MP bad ngi dang ïa pynbeit ïa u kyrtong na Tura constituency” u la ong.
U la pynshai shuh ba ka jingthaw ïa ka kynhun INDIA ka dei ban pynrem ïa ka BJP bad ha Meghalaya ka long ban ïakhun pyrshah ïa ka seng NPP kaba la synroplang bad ka BJP.
Haba kylli kumno ka Congress ka lah ban ïatreilang bad ka TMC ha Meghalaya haba u Dr. Mukul Sangma u dei uba la mih na ka Congress, u Bah Ronnie u la ong ba ka TMC kam dei ka seng shimet, hynrei ka don ïa ki nongkitkam.
Ha kajuh ka por u la ong lada ki nongïalam ha Delhi ki la bthah ki hap ban kohnguh ïa kane.
U la ong ka jingthaw ïa ka kynhun synrop INDIA da ki seng ba shong ha liang pyrshah ha Parliament ka long namar naduh ba la synshar ka BJP wat ka ïingbishar kam donbor shuh ban pynïaid ïa ki kam namar ki la sdang ban tuklar palat.
Ha kajuh ka por u la ïathuh ba ka Meghalaya Pradesh Congress Committee (MPCC) kan sa shong jingïalang ha ka 27 tarik mynta u bnai ban ïakren ïa ka ilekshon MP Lok Sabha bad ilekshon MDC ka ban long ha u snem 2024.
