Shillong, Nailur:
Ki MLA ki la buh jingkylli ha Ïingdorbar Thawaiñ ïa ka Sorkar halor kiba bun ki jingduna ha ki Anganwadi Centre kynthup ka jingbym don Anganwadi Centre ha bun tylli ki shnong kiba la dei hok ban ïoh ha kylleng ka Jylla. Ki jingkylli na ki MLA khamtam kiba don sha Liang Pyrshah la wanrah ha Ïingdorbar Thawaiñ ha ka sngi ba lai jong ka dorbar synrai ha ka sngi Balang.
Ïa kane ka jingkylli la wanrah nyngkong da ka MLA ka TMC na Ampati, ka Miani Dalbot Shira kaba la pan jingkheiñ katno tylli ki don ki shnong ki bym pat don Anganwadi Centre wat lada ki dei kiba biang ka jingbun briew ban ïoh ïa ka Anganwadi Centre bad ka jingbym ïoh pisa ki Anganwadi Centre kiba dei hok ban ïoh.
U Myntri ka tnat Social Welfare u Bah Paul Lyngdoh u la ong ba ki don kumba 1500 tylli ki shnong ki bym pat don Anganwadi Centre tangba ki don pat kiba la pynhap lang hapoh ka projek Early Child Development (ECD).
Halor ka jingkylli ka Miani, haduh lano ki shnong kin ïoh noh ïa ka Anganwadi Centre namar ki dei kiba donkam bha ban peit ïa ka jingheh jingsan ki khynnah, u Bah Paul u la ong ba ka jingthmu jong ka Sorkar ka long ban pyntikna ba baroh ki shnong kin don ka Anganwadi Centre kiba la biang ïa ki kyndon. U la ïathuh ruh ba ka Sorkar Jylla ka la dep pynsngew ruh sha ka tnat Women and Child Development ka Sorkar Pdeng bad la kumno-kumno ha kine ar snem, yn sa lah ban buh lut ïa ki Anganwadi Centre ha baroh ki shnong kiba la dei ban ïoh. Halor ka jingkylli u MLA ka TMC na Rajabala konstitwensi, u Dr Mizanur Rahman Kazi bym pat siew ïa ka tulop ki nongtrei Anganwadi bad ka kyndon ban don ki Anganwadi Centre, u Bah Paul u la ong ba ïa ka tulop la dep siew lai bnai, bad ka kyndon ban don ki Anganwadi Centre ki kynthup ïa ka jingbun briew kaba long 300 haduh 800 ngut ban buh ïa ka Anganwadi Centre kaba long pdeng, bad 150 haduh 300 ngut ban buh ïa ki Anganwadi Centre barit.
U MLA ka Congress na Mawhati, u Bah Charles Marngar u la pan jingshai katno tylli ki don ki Anganwadi Centre kiba la shu nohsynñiang da ki shnong ban maramot, ban shna jaka leit bar bad ban pynbiang ïa ka um. U Bah Paul u la ong ba ha kine ar snem ka Sorkar kan sa maramot ïa ki Anganwadi Centre bad kum u Myntri u la ïoh ruh ban leit jngoh ïa ki Anganwadi Centre ha ki katto katne ki district.
Kumta u la ong ba ha u Risaw, un sa lum ïa ka jingïalang ban phaidien biang haba ïadei bad ki Anganwadi Centre kiba la donkam ban maramot. U la ong ruh ba ha kane ka jingïalang yn sa ïakren shibun ki jingduna bad ki lad ban pynbha.
U Bah Charles Marngar u la ong ruh ba ki don ki Anganwadi Centre kiba ïoh ka ki khiew shetja da ka ilektrik, hynrei ka bording pat kam don, ha kaba u Myntri u la ong ba yn sa thawlad ban ïoh bording na kiwei pat ki tyllong kynthup na ka sngi.
Na ka liang u MLA ka Amlarem, u Bah Lahkmen Rymbui u la ong ba donkam ïa ka jingsngewthuh lang jong ki tnat kum ka Social Welfare, Education bad Health haba pyntreikam ïa ki skhim.
U MLA ka Congress na Umsning, u Dr Celestine Lyngdoh u la ong ba ki don ki khyllung kiba wan ïalam sha u da ki kmie ki kpa kiba ud pang pynhiar kpoh namar ba dih dud powdar kaba ki ïoh na Anganwadi Centre bad u kyrpad ïa ka Sorkar ban peit ba ki Anganwadi Centre kin ïoh um lut namar bym tikna wat na ka skhim JJM.
U Bah Paul u la ong ba ka jingthung shuh sa 6 ngut ki CDPO kan long ka jingïarap ha ka jingtreikam bad ha ki khyndiat snem yn sa ïohi ïa ka jingïapher.
U MLA ka TMC na Nongthymmai, u Bah Charles Pyngrope u la ong ba ki nongtrei Anganwadi ki dei kiba leit sha madan ban lum jingtip haba ïadei bad ki khyllung khynnah bad ïa kine donkam ban ai da ki smart phone ba kin kham suk ban buh jingthoh ryntih. Na ka liang u Bah Paul u la ong ba yn la pynmih ïa ka Expression of Interest (EOI) na ka bynta ban pynïoh ïa ki tiar kiba donkam ha ki Anganwadi Centre bad ki don ki Centre ha kaba ki nongtrei ki la ïoh smart phone.
