Shillong, Nailur 22
“Ngim tieng ïa u prah na West Bengal, hynrei ngi tieng ïa u prah Khasi lada ngin ïakhun ïa ka ilekshon MDC ha u snem 2024, la ong u Chief Executive Member (CEM) ka Khasi Hills Autonomous District Council (KHADC) Bah Pynïaid Sing Syiem.
Haba ïakren bad u Bah Pynïaid halor ka jingpynkhreh ïa ka ilekshon MDC ha u snem 2024 u la pynpaw ba ka seng NPP kaba bat ïa ka bor synshar ha Sorkar Jylla bad ha KHADC kan nym tieng ïa ka seng Voice of the People Party (VPP) namar u dei u prah na West Bengal, hynrei ka tieng tang ïa u prah Khasi.
U la ïathuh ba ha ka ilekshon MLA ba dang shu dep, ka seng NPP kam tip ïa kita ki seng kiba pyntlot ha ka por ilekshon hynrei mynta ha ka ilekshon MDC ka la dep pynkhreh ruh.
Haba kylli ka ilekshon MDC ha u snem 2024 kan ïaid beit ne em shakhmat, u Bah Pynïaid u la ong ba katkum ki dak ki shin la ïohi ba kan ïaid beit shakhmat namar haduh mynta ka Sorkar India kam shym la wanrah hapoh parliament ban pynkylla biang ïa ka 6th Schedule.
Haba kylli biang kumno phi sngew ba u nongïalam barim jong phi naduh ka seng HSPDP u la ïalam ïa ka seng VPP mynta, u Bah Pynïaid u la ong ba satang kiba la ïakynduh ban ïatreilang bad u Bah Ardent Basaïawmoit ki sngewthuh; hynrei ma u, u la dep ïatreilang bad u ha ki por ba mynshwa u la dep tip lut.
Haba kylli biang kaei ka jingmut ba u ong prah na West Bengal ïa ka VPP, pynban na ka liang u Bah Pynïaid u la ong un sa batai bniah ha kawei ka sngi.
Kum ban shu pynkynmaw, u Bah Pynïaid uba jop ïa ka ilekshon shiteng samoi na Mawryngkneng constituency na ka seng NPP, u la shah pynliem noh ha u kyrtong ka VPP Bah Heaving Stone Kharpran.
