Shillong, Nailur 22
U MLA ka North Shillong u Bah Adelbert Nongrum u la ïaid lait na ka rukom pynïaid dorbar haba ïadei bad ka jingwanrah ïa ka ‘call attention motion’ bad kane ka jingleh jong u ka la pynlong ban mih ka jingïania ha Ïingdorbar ha kaba u Lamphang ka Ïingdorbar u Thomas A Sangma ruh u la hap ban ïeng na ka jaka shong jong u namar ka jingleh jong une u MLA.
Katkum ka rukom pynïaid dorbar, ïa ka call attention motion, la ju shim tang kawei, bad ha ka sngi Thohdieng kaba dei ka sngi bakut ka dorbar synrai, napdeng ki lai tylli ki call attention motion, la shim tang ïa ka call attention motion jong u MLA ka Nongkrem u Bah Ardent Basaïawmoit.
Ynda la dep ka jong u Bah Ardent, u Symbud Lamphang kumba ju long ka rukom pynïaid dorbar u la khot noh ïa ka Myntri, ka Kong Ampareen Lyngdoh ban wanrah ïa ka jingbatai halor ka call attention motion’ jong u Bah Adelbert bad dei ha kane ka por ba une u MLA ka North Shillong u la pyni ïa ka jingbym tip ïa ka rukom pynïaid dorbar da kaba ïania bad buh jingkylli balei ym shah ïa u ba un kren ei ei hynrei la shu wanrah beit tang ka jingbatai (statement).
Ka call attention motion kaba lai ka dei jong u MLA ka Nongpoh u Bah Mayralborn Syiem ha kaba ïa ka jong u ruh la shu wanrah tang ka jingbatai.
Dei ha kane ka por ba u Lamphang u Thomas A Sangma ruh u la wan ban shim na u Symbud Lamphang ban pynïaid ïa ka dorbar.
Kane ka jingleh u Bah Adelbert ka la pynlong ïa u Symbud Myntri Rangbah u Bah Prestone Tynsong ban ïeng bad pynsngew ba u Bah Adelbert um dei ban leh drama hynrei u dei ban pule ïa ka kyndon pynïaid dorbar.
Haba u Bah Adelbert u la sdang pyneh bad pynibor pynban wat ïa u Lamphang, na ka liang u Lamphang u la ïeng na ka jaka shong ban kren ïa u bad kyrpad ba u dei ban shong namar ka kyndon bad rukom pynïaid dorbar ka shah ban shim tang kawei ka call attention motion.
Ha kane ka por u Bah Prestone ruh u la ïeng ban ther ïa u Bah Adelbert ha kaba la ïohi ba u Bah Adelbert u khlem shong satia wat lada u Lamphang u phah shong ha ka por ba u dang ïeng ban kren bad pynsngewthuh ïa u.
Kane ka jingleh ka la pynlong ruh ïa u MLA barim tam ka Jylla, u Dr Mukul Sangma ban ïeng na jaka shong ban kren ba ki dkhot kim dei satia ban pyni ka jinglong bym burom jong ki ïa u Lamphang khamtam haba u ïeng ban kren.
U Dr Mukul u la ai jingmut ba lehse namar ki bun ki dkhot kiba thymmai, donkam ruh ban don ka kynja workshop kum ka jinghikai ban sngewthuh kham bha.
Da ka jingkren pynkut na u Lamphang, u Bah Adelbert ruh u la sngap noh bad khlem ïania shuh, bad ka la wan ka jing jai jai ha Ïingdorbar.
