Shillong, Nailur 22
U nongïalam ka All India Trinamool Congress (AITC), u Dr. Mukul Sangma, u la shah dawa haduh T.20 klur na ki nongïasaid aiñ kiba mihkhmat ïa u Henry Lalremsanga kum ka bai mynraiñ khmat.
Kane ka jingshah dawa bai mynraiñ khmat jong u Dr. Sangma ka la wan lyngba ka shithi ba ka phah da ki nongïasaid aiñ jong u Henry, ha kaba la ong ba ka jingkynnoh jong u Dr. Sangma ba u Henry u dei u snar nongkhaïi drok lane uta u ‘Drug Kingpin’, ka dei kaba la pynjah burom bad kaba pynbudnam ïa u Henry.
Kum ban pynkynmaw, myn ha ka 19 tarik u Nailur, 2023, u Dr. Sangma u la pyni da ka dur hapoh ka ïingdorbar thawaiñ ha kaba la ïohi ba u Myntri Rangbah ka Jylla, u Conrad K. Sangma uba la ïashon dur lang bad u Henry Lalremsanga.
Halor katei ka bynta, na ka liang ki nongïasaid aiñ jong u Henry ki la phah da ka ‘Legal Notice’ pyrshah ïa u Dr. Sangma halor ka jingbakla ha ka rukom kren, namar ka jingkynnoh jong u ka la saphriang shabar, bad ka la ktah ïa ka kam, ka kyrteng jong u Henry, bad kumjuh ïa ka ïing ka sem jong u.
Kumta na ka liang ki nongïasaid aiñ jong u Henry, ki la dawa na u Dr. Sangma ba u dei ban panmap, ban siew T.20 klur hapoh 7 sngi, bad ban sangeh noh ïa ki jingkynnoh pyrshah ïa u Henry.
Nalorkata, la ong ruh ba lada u Dr. Sangma um lah ban pynurlong ïa kine ki jingdawa, na ka liang u Henry un shim da kiwei ki sienjam.
Ki nongïasaid aiñ ki la ong ba u Henry u la shah kem bakla ha u snem 2013 halor ka kynnoh ba u donkti ban khaïi be-aiñ ïa ki dawai, hynrei u Henry u la don ïa ka laisen.
U la shah pyllait noh da ka ïingshari halor ka jingbym don ki sabut kiba biang.
Shuh shuh, la ong ruh ba kine ki jingkynnoh jong u Dr. Sangma pyrshah ïa u Henry ki dei ki bym shong nongrim.
