Shillong, Nailur 22
U Myntri Rangbah, u Conrad K Sangma, ha ka Sngi Thohdieng u la ïathuh ba u Chairman jong kawei ka kynhun lehnoh thymmai u la pyndonkam da ka Facebook ban khroh ïa kiwei pat ban pynïasoh sha kane ka kynhun bad ha kajuh ka por u la ong ba kine ki la don jingthmu ban lute bad ban pynbthei bom khnang ban pynshong syier ïa ki paidbah.
Haba jubab ïa ka ‘Calling Attention Notice’ ba la wanrah da u MLA ka Nongpoh konstitwensi, u Bah Mayralborn Syiem, halor ka khubor kaba la mih ha U Nongsaiñ Hima ha ka 18 tarik Nailar, 2023, u Conrad u la batai halor ka jingmih jong ka kynhun lehnoh ïa kaba la ai kyrteng ‘National Liberation Council of Nongkyndong (NLCN)’.
U Conrad u la ong ba ha ka 16 tarik, Nailar 2023 la ïoh pdiang ïa kawei ka FIR halor ka jingmih ka kynhun lehnoh thymmai ïa kaba la tip kum ka NLCN. U la ong ba ka jingthmu jong kane ka NLCN ka long ban ïakhun pyrshah ïa ka sorkar bad ban leh ïa ki kam be-aiñ kum ka jingthied ïa ki tiar siat, ban lute, ban pynrung ïa ki dkhot bad ai jinghikai ïa ki bad ban buh ïa ki ktem jong kane ka kynhun. Ïa kane ka FIR la pynrung ha ka Crime Branch Police Station bad ïa ka jingtohkit la khmih da u DIG Eastern Range.
Hapdeng jong ka jingtohkit, la ïoh kem ïa uwei u khynnah uba dang hapoh 18 snem bad 10 ngut kiwei pat bad la kurup na ki ïa kiba bun tylli ki sabut ha kaba ïadei bad ka NLCN. Ha ka jingtohkit, u Conrad u la ong ba kitei kiba la shah kem ki la phla ba ka long kaba shisha ba la thaw ïa ka NLCN bad la thung ïa u Chairman, Commander in Chief, Acting General Secretary, Finance Secretary, bad ki Area Commander ha East Jaiñtia Hills, West Jaiñtia Hills, Ri War Area bad West Khasi Hills.
Shuh shuh u la ïathuh ba u Chairman ka NLCN u la ong ba ïa ka kyrteng NLCN la shim na ka Hynñiewtrep National Liberation Council (HNLC) bad ïa ka kyntien ‘Nongkyndong’ la buh khnang ban pynpaw ïa ka jingduna ka jingshngaiñ bad ka roi ka kiew ha ki nongkyndong khamtam ha ki jaka khappud. Nalor kata, u Conrad u la ong ba u Chairman ka NLCN u la kam ba la thaw ïa kane ka kynhun naduh ka 15 tarik Nailur 2022 hynrei namar ka jingduna ki nongkyrshan bad jingduna pisa kumta u la hap ban sangeh noh shwa. Hynrei ha ki bnai ba bud ka jingkwah ban ïada ïa ka jaidbynriew Hynñiewtrep ka la khie im biang bad namarkata utei u Chairman u la thaw biang ïa ka NLCN haba sdang jong u snem 2023 da kaba pynrung dkhot lyngba ki rynsan Social Media.
U Conrad u la ong ba lyngba ka Facebook utei u Chairman ka NLCN u la khroh ïa kiba bun ki nongpyndonkam Facebook da kaba pyni ïa ka thong jong ka NLCN ba kynthup ïa ka jingdawa ban ïoh ïa ka jylla Hynñiewtrep bad ban pynbha ïa ki paidbah ka jaidbynriew Hynñiewtrep. Utei u Chairman u la lah ruh ban pynkohnguh ïa ki briew ba kin pynïasoh sha ka NLCN bad u la kular ruh ba kin ïoh jinghikai, ban thied ïa ki tiar siat, bad ban donkti ha ki kam lute. Nalor kata ki dkhot ka NLCN ki la ïoh jingtip na u Chairman ba u la ïakren bad ki dkhot ki seng lehnoh ha Northeast halor ki mat kum ka jingthied ïa ki tiar siat bad ban ai jinghikai ïa ki dkhot.
Na ka liang ka NLCN pat kan hap ban ai jaka rieh ha Ri lum Khasi Jaiñtia ïa ki dkhot ki seng lehnoh na kiwei pat ki bynta ka Shatei Lam Mihngi. U Conrad u la ong ba katkum ka jingïathuh jong u Chairman ka NLCN ka jingïakhih ha Manipur bad ki jingeh ba ïakynduh da ki seng lehnoh ha Shatei Lam Mihngi ka la pynpulom noh ïa ka jingthmu ban thied tiar siat bad ban shah hikai. Namar kata utei u Chairman bad ki dkhot ki la don sa da kawei pat ka jingthmu bad kata ka long ban lute bad ban pynbthei bomb kum shi bynta ban pynbna ïa ka jingmih jong ka NLCN bad kumjuh ruh ban pynshong syier ïa ki paidbah hynrei u Conrad u la ong na ka daw ba ki pulit ki la kloi, ki jingthmu jong ka NLCN ki la pulom noh.
U Myntri Rangbah u la pyntip ba ka jingtohkit halor kane ka dang ïaid khnang ban lap shuh shuh ïa ki jingshisha.
