Shillong, Nailur 24
Ka Meghalaya Pradesh Congress Committee (MPCC) kan shong jingïalang ha ka 27 tarik mynta u bnai ban wad kyrtong MP Lok Sabha ha Tura konstitwensi kumjuh ruh ban ïakren kumno ban pynkhreh ïa ka ilekshon MDC ha u 2024.
Haba ïakren bad u Bah Ronnie V Lyngdoh uba dei u MLA ka Congress bad nongïalam ka liang pyrshah ha ïingdorbar thawaiñ, u la ïathuh hadien ba la kut ka dorbar synrai ka Congress kan sa shong pyrkhat na ka bynta ban wad kyrtong ha Tura konstitwensi na bynta ka ilekshon MP Lok Sabha bad kumjuh ruh ban ïakren noh ban wad kyrtong ïa ki MDC na ka bynta ka ilekshon ha KHADC bad JHADC ha u snem 2024.
U la ïathuh hadien ka 27 tarik mynta u bnai ka Congress kan sa bthah ïa ki Block ban pynpoi noh ïa ki kyrteng jong ki kyrtong kiba kwah ban ïakhun ïa ka ilekshon MDC khnang ban ïoh pynbna ha ka por ba biang bha.
Haba kylli phin ïakhun hi ïa ka ilekshon MDC, u Bah Ronnie u la ong ka shong ha ki shnat (unit) treikam ban tyrwa, hynrei lada don kiba kwah un ailad ïa kiwei namar ka Congress kam dei ka seng u ‘riewshimet bad ka dei ka seng kaba hap ïa mynjur da baroh.
Nalor nangta, u la ïathuh ba haduh mynta ym pat don kiba pynpaw ba ki kwah ban ïakhun ïa ka ilekshon MDC na ka Congress bad lada ki nongkyrshan ki tyrwa ïa ka kyrteng jong u, u lah ban ïakhun hi.
Shuh shuh u Bah Ronnie u don jingkyrmen ba ki paidbah haduh mynta ki dang ai jingshaniah ïa ka seng Congress namar dei tang kane ka seng ka bym ñiew shiliang ïa baroh ki niam ne jaidbynriew.
Halor ka jingïatreilang ki seng saiñpyrthei ha ka kynhun synrop INDIA, u Bah Ronnie u la pyntip ba ka seng kan sa ïakren lang ha ka 27 tarik mynta u bnai namar ha Meghalaya ki don tang ka Congress bad ka TMC.
Ha kajuh ka por u la ïathuh ba haduh mynta ka AICC na Delhi kam pat ai jingbthah ban ïa pynbeit bad ka TMC ha ka kynhun synrop INDIA na ka bynta ka ilekshon MP Lok Sabha.
