Jowai, Nailur 24
Ka samla Dorothy Roy Tariang kaba na sor Jowai ka la ïoh pdiang ïa ka Gold Medal namar ka jingwan ha ka kyrdan kaba hakhmat eh ha ka jingpule MBA na ka Assam Don Bosco University da kaba ïoh heh tam haba kheiñ ïa ka Cumulative Grade Point Average (CGPA) kaba long 9.29 na ka 10.0.
Ka samla Dorothy ka dei ka khun jong ka Dr. Iwbih Nylla Tariang, Senior Veterinary Officer bad u nongthoh khubor u Dr. Anirban Roy kiba shong ba sah ha Mynthong, Jowai.
Ka samla Dorothy ka la pyntbit ïalade ha ka jingpule Human Resource Management. Kan dei ka sien kaba nyngkong eh ba ka samla pule na Meghalaya kan ïoh ïa ka kyrdan ‘topper’ ha ka jingpule MBA jong ka Assam Don Bosco University.
Ka samla Dorothy ka la ïoh pdiang ïa kane ka Gold Medal ha ka Convocation kaba 12 jong ka Assam Don Bosco University kaba la long ha ka Sngi Saitjaiñ hapoh Tapesia Campus hajan ka sor Guwahati.
Shwa ba kan leit pynïasoh ha ka jingpule MBA, ka samla Dorothy ka la pyndep ïa ka Graduation ha ka English Literature napoh Amity University.
U Lat ka Assam u Gulab Chand Kataria uba dei ruh u Visitor jong ka Assam Don Bosco University u la sam ïa ka khusnam sha kiba wan ha ki kyrdan kiba shakhmat ha ka jingdonlang u Chancellor ka Assam Don Bosco University, u Fr. Januarius Sangma, u Vice Chancellor ka University, u Fr. (Dr) Jose Palely bad kiwei.
Ka samla Dorothy da ka jingkmen ïa ka jingjop ka la ong ba ka don ïa ka jingthrang ban trei na ka bynta ban kyntiew ïa ka bha ka miat bad ka roi ka par jong ki nongshong shnong ka Meghalaya.
