Ka jingïakhun ha ka ilekshon MDC ha JHADC kan long hapdeng ka UDP bad NPP: Lasky Rymbai

U la ïathuh ba ha u snem 2019 ka UDP ka jop haduh 10 ngut ki MDC, hynrei mynta ka la sah satang hynñiew ngut.

Shillong, Nailur 24

U MDC ka UDP na Tuber konstitwensi, East Jaiñtia Hills District Bah Lasky Rymbai uba dei ruh u Deputy Chief Executive Member (CEM) ka Jaiñtia Hills Autonomous District Council (JHADC) u la ong ba ka jingïakhun ïa ka ilekshon MDC ha JHADC ha u snem 2024 kan long beit hapdeng ka UDP bad NPP.

U la ïathuh ba haduh mynta ym pat tip haduh katno ka khlaiñ ka lyer ba beh jong ka VPP hynrei un sa sngewthuh ynda kane ka seng ka la pynbna ïa ki kyrtong.

U la ïathuh ba ha u snem 2019 ka UDP ka jop haduh 10 ngut ki MDC, hynrei mynta ka la sah satang hynñiew ngut.

Kumta u don jingkyrmen ba ki lai ngut ki MDC ka NPP ki la wan pynpaw ba ki kwah ban ïakhun ïa ka ilekshon MDC na ka tiket UDP ha u snem 2024.

Shuh shuh u la pynpaw ba wat la ka NPP ka la jop saw ngut ki MLA ha kane ka ilekshon MLA ba dang shu dep bad ïoh synshar biang ïa ka sorkar jylla, hynrei u don jingkyrmen ba ka UDP kan jop kham bun ki MDC namar ki lai ngut ki MLA ka UDP ruh ki dang wanphai biang ha kane ka ilekshon MLA ba dang shu dep.

Nalor kane, u la ïathuh ba ha ka konstitwensi jong u Dr. Sanky Shangpung kaba u la dep leit pynïasoh sha ka seng NPP la don da uwei u MDC barim uba la wan tyrwa ban pan tiket na ka UDP bad ïa kane kin sa bishar da ki unit bad ka District.

U la pyntip ruh ba ki la don bun ngut ki kyrtong kiba la wan pan tiket na ka UDP ha ka ilekshon MDC na JHADC.

Namar kata, u don jingkyrmen ba ki unit kin sa jied ïa ki kyrtong kiba kynsai ban phah sha ka District, bad ka District kan sa phah beit sha ka UDP State Election Committee.

Wat la u Bah Lasky u la kam ba ka jingïakhun ïa ka ilekshon MDC ha JHADC kan long hapdeng ka UDP bad NPP, hynrei la sngewthuh ba kine ar tylli ki seng kin sa ïatreilang biang ban thaw ïa ka EC kaba thymmai ha JHADC ynda la kut ka ilekshon namar ha sorkar jylla kine ar tylli ki seng ki dang bteng ka jingïatreilang.

Na ki 7 ngut ki MDC ka UDP kiba la don lypa, ka UDP mynta ka hap ban wad kyrtong thymmai haduh 22 ngut ban pynïeng ha kane ka ilekshon MDC ban long la shem snem.