Shillong, Nailur 24
Ka National Investigation Agency (NIA) ha ka Sngi Thohdieng ka la ïoh kem ïa uwei u briew ba la tip kyrteng kum u Moirangthem Anand Singh halor ka jingkynnoh ba ka don ka jingïasylla da ki nongïalam ki seng lehnoh kiba shong ha Myanmar ban ïakhun pyrshah ïa ka Sorkar India da kaba shim kabu na ka jingïakynad kaba dang ïaid ha Manipur.
Ïa ka jingujor halor katei ka jingïasylla la pynrung da ka NIA ha ka 19 tarik Naitung, 2023 ha New Delhi.
Katkum u kyrwoh khubor ba la pyllait da katei ka kynhun tohkit, la ong ba ka jingtohkit ïa katei ka jingujor (RC 23/2023/NIA/DLI) da ka NIA ka la pyni ba kum shi bynta na ka jingïasylla, ki nongïalam ki seng lehnoh kiba shong ha Myanmar, ki kynhun kieng atiar ki la pynrung ïa ki briew ban long kum ki Over Ground Worker (OGW), dkhot bad ki nonglehbha khnang ban pynkhlaiñ ha ka jingïakhun pyrshah ïa ki bor pahara bad ïa kiwei pat ki jaitbynriew da kaba shim kabu na ka jingïakynad kaba dang ïaid haduh mynta ha Manipur.
Khnang ban leh ïa kitei ki kam bymman, ka NIA ka la ong ba ki nongïalam ki seng lehnoh ki la lum ïa ki tiar siat bad tiar pynbthei ba kynthup ïa ka jingtuh jinglute na ki shlem treikam jong ka sorkar.
Ïa utei uba la shah kem la wanlam noh sha New Delhi bad ha ka Sngi Saitjaiñ, kawei ka ïingbishar ka la ai hukum ban set ïa u ha along pulit na ka bynta san sngi haduh ka 27 tarik Nailur, 2023. Ka NIA ka la ong ba ka jingtohkit halor kane ka dang ïaid shakhmat.
