Shillong, Nailur 24
Ka tnat Customs ka la ïoh ban kurup ksiar ba shongdor da ki klur tyngka ha ki ar bnai ba la dep na kane ka nongbah.
Ha u kyrwoh khubor ba la ai ha ka Sngi U Blei, ka tnat Customs ka la pyntip ba hadien ba la ïoh ïa ka jingtip ba thikna ba kan don ka jingrah ïa ka ksiar na khappud jong ka India-Bangladesh ha Meghalaya sha Guwahati, ki nongtrei ka shlem Commissioner of Customs Preventive (CCP), Shillong ki la pynsangeh ïa kawei ka kali Mahindra XUV500 ha ka step jong ka Sngi Saitjaiñ ha Jhalupara, Shillong. U la don tang uwei u briew ha kata ka kali uba shong ba sah ha Rangia, Assam wat la u dei uba ju shong ju sah mynshwa ha West Bengal.
Ha ka jingtohkit, utei u briew u la phla ba u la rah ïa ka ksiar ba la wan nabar ri. Hadien kata, la lap ïa 14 tylli ki biskit ksiar ba la song ha ki artylli ki pla plastik. Ka jingkhia jong kane ka ksiar ka long 1632.450 Gram bad ka shongdor T. 1,01,78,326.
Nalorkata, la don ruh sa uwei pat u briew uba la donkti ban ai 7 tylli ki biskit ksiar sha utei uba la shah kem, bad ïa uta ruh, ki nongtrei ka tnat Customs ki la ïoh bat ïa u ha Jhalupara.
Haba la tohkit sa ïa utei uba la shah bat, u la ïathuh ba u la shim ïa ka ksiar na kawei ka briew kaba don dukan ha Ïewduh. Ki briew ka tnat Customs ki la leit sha kata ka dukan bad ki la ïoh ban kurup ka pisa kaba T. 9.5 lak bad la phla ba kane ka pisa ka dei na ka jingdie ïa ka ksiar ba la shu khaïi be-aiñ. Ïa kane ka pisa la kurup noh da ki briew ka tnat Customs.
Ha ka jingtohkit ïa katei ka briew kaba don dukan ha Ïewduh, la ïathuh ba katei ka ksiar ka dei kaba la khaïi be-aiñ lyngba u khappud India-Bangladesh. Ka tnat Customs ka la kem noh ïa kitei ki lai ngut bad ka jingtohkit ka dang ïaid.
Ha kawei pat ka liang, ka tnat Customs ka la pyntip ba ha u bnai ba la dep, la ïoh ban kurup san tylli ki biskit ksiar kiba khia 582.70 Gram. Ïa kine la ïoh kurup na uwei u briew uba la don ha ka kali Maruti Car 800 bad la ïoh bat ïa u na Jorabat. Kane ka ksiar ka dei kaba la khaïi be-aiñ na Bholaganj kaba don ha khappud India-Bangladesh.
Ha ka jingbuddien ïa kane, ki briew ka tnat Customs ki la leit sha kawei ka ïing ha Lumparing, bad dei na kane ka ïing ba la shim ïa katei ka ksiar. Ha ka jingkhynra, la ïoh ban kurup ïa ka pisa haduh T. 3.96 klur bad la suba ba kane ka dei ka pisa ba la ïoh na ka jingdie ïa katei ka ksiar. Ïa kane ka pisa ruh ki briew ka tnat Customs ki la kurup noh.
