Shillong, Nailur 24
Ki bahaïing hasem jong ar ngut ki khynnah samla kiba la jah rngai naduh ka 20 tarik mynta u bnai kim pat ïoh khubor satia halor jong ki watla ka jingwad ka dang bteng khlem sangeh haduh mynta ka sngi.
Kitei ar ngut ki kynthup ïa u Wanbok Kurbah (20 snem ka rta) bad ka Phibankyntiew Sun (18 snem ka rta).
“Ngim pat ïoh jingtip eiei. Ngi la wad sha Lad Marpna, Mairang, Umsohïong, Bhoi – Umroi, Damsait. Mynne ruh ngi la pynlong ïa ka jingwad shnong ha ryngkat ki pulit,” la ong ka hynmen u Wanbok, Kong I. Kurbah.
Ka la ïathuh ruh ba ha shuwa ba ka ‘phone’ jong u kan lip ha katei ka sngi, ka kmie ka la ïoh lad ban ïakren bad u.
“Ha ka por ba ïakren bad i Mei, u ong ba don ha Stand Mawngap bad i Mei i la ong ïa u ban leit noh sha ïing,” ka la ong.
Kitei ar ngut ki dei kiba pule ha ka klas XI ha St. Paul’s Higher Secondary School, Marbisu.
Ka la ïathuh ruh ba katba dang pynlong ka jingwad ïa ki ha ka Sngi Palei bad haba la pyni ïa ki dur, ki don ki briew kiba la ïohi ïa ki ha Lad Marpna katba ki dang thied jingthied ha ka por kumba 6 baje eiei janmiet (Sngi Balang).
“Ngim don daw eiei ha ïing bad ngi sah ha ka umdum,” la ong ka hynmen u Wanbok.
Kitei ar ngut kiba na ka thaiñ Marbisu ki la jah rngai naduh ka Sngi Balang, ka 20 tarik mynta u bnai bad ym shym la tip shano ki leit ne don.
La ong ba ïa kitei ar ngut la ïohi khatduh ha ka por kumba 5 baje eiei jong ka janmiet Sngi Balang.
Ha kaba ïadei bad ka jingjah rngai jong kitei ar ngut, na ka liang ki bahaïing hasem ki la leit ban wad ha kylleng ki jaka bad leit pan jingïarap ruh na ki paidbah.
Na ka liang ki bahaïing hasem jong kitei ar ngut ki la shim khia da kaba leit ban ujor ne pyntip noh ïa kaei kaba la jia sha ki pulit ka thanat Mawngap.
Shuh shuh ki la buh ka jingkyrpad ba lada don kino-kino kiba ïohi ïa kitei ar ngut ba kin mih shakhmat ban ai ïa ki jingtip khnang ban lap ïa ki bad kino-kino kiba don ïa ki jingtip ki lah ban ‘phone’ ha kine ki nombar – 8837472633 lane 6909673390.
