
Shillong, Nailur 25
Namar ka jingjur jong ka dheng kali ha kiba bun ki bynta jong ka nongbah Shillong, kumta ban poi biang por sha ka jingshong dorbar, u Chief Execu-tive Member (CEM) ka Khasi Hills Autonomous District Council (KHADC) Bah Pynïaid Sing Syiem ha ka Lah Sngi U Blei u la pyndonkam da ka thuk thuk ban ñiah hi ban wan beh ïa ka dorbar jong ka council.
Kane ka jingpyndonkam da ka thuk-thuk ban wan sha ka dorbar kyrpang jogn ka council, ka long ruh kum ka nuksa ïa kiwei pat ban bud ïa kane ka rukom khnang ban lait na ka jingdheng kali.
U CEM u la ai jingmut ïa kiwei ki MDC ba kin pyndonkam da ki thuk-thuk haba wan sha ïingdorbar bad ban buh noh ki kali ha ïing khnang ba kin poi biang por sha dorbar bad lait na ka jingsahkut ha ka dheng kali.
Haba kren ha kane ka sngi u Bah Pynïaid u la pynpaw ka jingsngewhun halor ka rai ba u la shim bad kdew ba kumno kane ka jingpyndonkam da ka thuk-thuk ka la pyllait ïa u na ka jingdheng kali bad u la poi ha ka por kaba biang sha ka dorbar.