Shillong, Nailur 25
U State President barim ka Bharatiya Janata Party (BJP), Bah Ernest Mawrie u la ong ba ka jingthung ïa u Rikman Momin kum u President ba-thymmai ka long katkum ka rukom pynïaid ka seng ynda ka samoi treikam jong u President barim ka la kut.
“Mynta ka sngi, ka jingpynbna ka la mih na ka ophis ba halor jong ka seng, ki la jied ïa u President bathymmai, u Rikman Momin na Ri-lum Garo,” la ong u Bah Mawrie ha ka Lah Sngi U Blei.
U la pynshai ruh ba kumba ka long, ka samoi treikam jong u ka la kut bad ka la tam palat ïa ka 3 snem bad kumta ka seng ka la shim ïa ka rai ban thung ïa u President bathymmai.
Na ka liang jong u, u la ai khublei ïa ki nongïalam ba halor jong ka seng naduh u National President, J.P. Nadda uba u Bah Mawrie u la trei hapoh jong u la palat 3 snem kumjuh ïa baroh ki nongïalam ba halor; kiba la ïatreilang bad u (kum ka kynhun) kum u State President ka Jylla.
“Kumta ka dei ka rukom pynïaid hapoh ka seng…haba ka samoi treikam ka la kut…ngi hap ban jied ïa u President thymmai,” u la ong.
Ha kawei ka liang, u la kren shai ba u dang don bad ka seng bad un ïai trei ban pynkhlaiñ ïa ka na ka por sha ka por.
“Nga ai khublei kitbok kitrwiang ïa u President bathymmai, u Rikman Momin,” u la ong.
Haba kylli, u la ong ba hapoh ka seng, ki don ar jait ki rukom pynïaid katkum ka riti synshar, ka jingjied bad ka ilekshon bad kumba ka long mynta, ka seng ka dang ïaid da ka jingjied ha ka ban thung ïa u President.
Ha kajuh ka por, haba jubab, u la ong, “Kam shym la don kano-kano ka jingïakren, ka dei ka rai jong ki…ki nongïalam ba halor jong ka seng.”
U la ïathuh ruh ba u la ïakren bad u Momin hynnin ka sngi hadien ba u (Mawrie) la ïoh ban ïakren bad 2-3 ngut ki nongïalam na Delhi.
“Ki la ong ïa nga ban pyntip sha u bad nga la pyntip sha u. Mynne ki la pynmih ïa ka jingpynbna bad nga la pyntip sha u mynta ka sngi. Nga la phah wan ïa u namar ngi don ka rukom ban aiti ïa ka kam,” u la ong.
Shuh shuh u Bah Mawrie u la ong, “Lehse lashai, lashisngi un sa wan ban shimti ïa ka kam.”
Kum ban shu kdew hangne, ka kyrwoh ha ka Lah Sngi U Blei na u National General Secretary & Headquarter Incharge, u Arun Singh, ka ong ba u National President ka BJP, u Jagat Prakash Nadda u la thung ïa u Rikman Momin kum u State President ka BJP-Meghalaya.
