Nongstoiñ, Nailur 25
Ka Nongstoiñ College ha ka 25 tarik mynta u bnai ka la ïoh ban pynlong ïa ka Graduation Day jong ka kolej na ka bynta u snem 2023. Ha kane ka sngi la ïoh ruh ban plie ïa ar tylli ki building ba thymmai ba kynthup ïa ka Commerce building bad ka Girls Hostel ha kaba u Rakkam A Sangma, uba dei u Myntri ka tnat pule puthi ka Sorkar Jylla u la ïadon lang kum u kongsan.
Ha katei ka sngi, ka kolej ka la ïoh ban pynkup burom kyrpang ruh ïa saw ngut ki samla pule kiba la pyndep ïa ka Graduate bad kiba la wan ha ki kyrdan kiba shakhmat ba kynthup ïa ka Ibajanai Lyngdoh 4th position ha ka Zoology, u Kosphalan Lyngkhoi 6th position ha ka Zoology, Pynshaitbor Thongni 6th Position ha ka Chemistry bad ka Pynishisha Wanniang 10th Position ha ka Political Science.
Nalor kitei ki saw ngut, ka kolej ka la ïoh ruh ban ai ïa ki memento sha baroh kiba la pyndep ïa ka Graduate jong u snem 2023 kiba kynthup ha ka Art, Commerce bad Science Stream. Ha kajuh ka por la ïoh ruh ban pynkup burom ïa ki nonghikai kiba la pyndep ïa ka Doctorate Degree, kumjuh ïa ki nongkitkam barim ka Sponsoring Body.
Haba ai jingkren ha katei ka sngi, u Myntri u la ong, kane ka sngi ka long kaba kyrpang ïa ki samla pule kiba la pyndep ïa ki jingpule ki jong ki ha ki lai tylli ki stream bad u la ai ruh ka jingïaroh ïa ka kolej kaba lah ban plie ïa ar tylli ki building jong ka kolej na ka bynta ban shakri khambha ïa ki khynnah lyngba ka pule puthi.
U Myntri u la ïaroh ïa u MLA barim ka Nongstoiñ u Bah Macmillan Byrsat uba don ha ka sorkar MDA ka barim hapoh ka jingïalam u Conrad K Sangma kum u Myntri Rangbah uba la lah ban pynïoh ban mang kam ïa palat 40 ngut ki nonghikai ha ka Arts Stream.
U la ong ruh ba ka jingpdiang jong ka Nongstoiñ College ïa ka New Education Policy (NEP) kan ailad ïa ki samla ba kin ïoh ban jied ïa ka mon jong ki ban pule ha kiba bun ki bynta.
U la kular ruh ba kum u Myntri ka tnat pule puthi un ïai bteng ban shim ïa ka jingkitkhlieh na ka bynta ban pynbiang ïa ki jingdonkam ha ki jaka pule ban ai jingïarap sha ki kolej bad ha kajuh ka por u la kyntu ïa ki samla pule ka kolej ba kin pyrshang ban ïeng ha la ki jong ki kjat ym tang ban shu ap khmih lynti ïa ka kam sorkar.
U la ong ruh ba man ka snem 10 haduh 15 hajar ngut ki samla ki ïoh ban pyndep ïa ki jingpule katba ki kam sorkar kiba lait ki long tang shi hajar. Kumta kum ki samla pule kim dei ban khmih lynti eh ïa ka kam sorkar, hynrei u la pynshlur ïa ki ba kin trei ïa ki kam ha ki kompeni kiba don shabar ka Jylla.
U la pynshlur ruh ïa ki samla pule ba ka dei ka bynta ka jong ki ba kin ai pat ha ka imlang ka sahlang bad ki lah ban kylla long ki nongïalam niam, ki nongïalam saiñ pyrthei, ki ophisar ha ki tnat sorkar bapher bapher hynrei ka dei ka bynta ka jong ki ba kin ai kaba bha tam sha ka imlang ka sahlang.
Ha katei sngi la donlang u Bah HM Shangpliang, nongaibuit ka tnat pule puthi ka sorkar kum u symbud kongsan, u DC ka West Khasi Hills, u MLA barim ka Nongstoiñ Bah Macmillan Byrsat uba long ruh u Chairman ka Governing Body ka Nongstoiñ College, u Dr. L.L Mawsor Secretary Governing Body, Dr. I Mawthoh, Principal Nongstoiñ College, ki principal na kiwei ki skul, ki nonghikai, ki samla pule bad kiwei kiwei.
