Shillong, Nailur 25
Ka Hynñiewtrep National Youth Front (HNYF), East Khasi Hills District ha ka Lah Sngi U Blei ka la leit ban ai jingmut ïa ka Deputy Commissioner (DC) ka East Khasi Hills District, ka Kong R.M Kurbah ban shim khia ha kaba ïadei bad ka jingdheng kali ha nongbah Shillong bad ha kiwei kiwei ki bynta jong ka East Khasi Hills District ha ki sngi ba la sdang ka jinglehñiam Puja jong ki riewngeit Hindu kiba shong ba sah hapoh kane ka jylla.
Haba kren sha ki lad pathai khubor, u President jong ka HNYF, u Bah Bless Dkhar u la ong ba man la ka snem ba don ki jinglehñiam leh rukom lane ka Puja da ki riewngeit Hindu, ka ju wanrah jingeh bha ïa ki paidbah nongleit nongwan namar ka jingkhapngiah eh bad ka jingdheng kali.
U Bah Dkhar u la ong ba ka seng ka la wan ban ai da ka jingujor sha ka DC khnang ban nym shah shuh ïa kito ki nongdie madan ba kin die jingdie ha ki lynti ki syngkien ha ka por Puja namar kane ka wanrah ïa ka jingdheng kali kaba jur.
“Ka surok kam dei hi ruh jong ki hynrei wat la katta ka jingmane blei jong ki lada ka dei shapoh jaka jong ki, ngim don eiei ban ïakren hynrei lada ka dei pat ha ka jaka kaba dei ka ïaid ka ïeng jong ki paidbah, na ka liang jong ngi na kata ka daw ngi la wan ban ai da ka jingujor”, la ong u Bah Dkhar.
U Bah Dkhar u la ong ba na ka liang jong ka DC ka la ïathuh ba ka dang shu dep ban shong jingïalang bad ki nongpynïaid jong ka ñiam Hindu bad ka la ong ba kam shah shuh ba ka jinglehñiam Puja kan long kumba ju long ha ki por mynshwa ba kin ïadie pathar ha ki lynti ki syngkien.
“Ngi sngewtynnad bad ngi sngewkmen ba ka DC ruh ka long ka briew kaba sngewkhia bha na ka bynta ka suk ka saiñ bad na ka bynta ka jingeh jong ngi u paidbah”, la ong u Bah Dkhar.
U Bah Dkhar u la ong ruh ba ha ka por Khristmas, ki khristan kim ju wanrah ïa kano-kano ka jingdheng kali hynrei ki leit beit sha ïingmane bad kam ju don jingktah ne jingpynwit ïano ïano ruh.
U la ong ba ha ka sngi kut jong ka jinglehñiam Puja ruh lada ïaid na ki thaiñ Garikhana ka long kaba don jingma bha ïa ki Khasi namar ba kitei kiba lehñiam ki la ïaleh shongshit ha ryngkat ka jingbuaid.
Nalor kata, u Bah Dkhar u la ong ba ka seng ka la ïakren ruh bad ka DC ha kaba ïadei bad ka sngi bret blei jong ki riewngeit Hindu ha Wah Umkhrah kaba dei ka sngi pynkut ïa ka lehñiam Puja namar kumba ka long ym shah shuh ban bret plastik hapoh katei ka wah khnang ban pyntikna ba kane ka wah kan nym shah pynjakhlia.
Na ka liang ka DC ka la ong ba lada ki riewngeit Hindu ki bret ïa ka blei jong ki ruh ha katei ka wah, ha ka sngi kaba bud ki dei ban pynkhuid. Kumta na ka liang ka seng ka la ong ba kan sa peit bad khmih la kitei ki riewngeit Hindu ki leh ne kim leh kumba la bthah ïa ki ban leh.
