Shillong, Nailur 25
U MDC ka Shella konstitwensi, u Bah Teiñwell Dkhar u la pynsngew ha Ïingdorbar ka Khasi Hills Autonomous District Council (KHADC) haba ïadei bad ka jingbym long ryntih bad laitlan ka MDC Hostel ha kaba u la ïathuh ruh ka kylla kum ka ktem ki ksew namar ka jingjyllei palat ki ksew.
U Bah Teiñwell u la pynpaw ïa kane haba u wanrah ïa ka jingkren jong u halor ka jingmang pisa ïa ka legislative wing na ka bynta kiba bun ki jingdonkam kiba dei ban pynlut.
Haba batai shaphang ka jingdkoh ka rukom treikam ka legislative ha ka liang jingpyllait pisa, u Bah Teiñwell u la ai jingmut ban don noh sa uwei u Drawing and Disbursing Officer (DDO) u ban peit ïa ki kam ka legislative.
Une u MDC u la pynsngew ruh ïa ka jingbym don ka jinglong ryntih bad ka jinglong laitlan ka MDC Hostel bad ka jingjakhlia jong kane ka jaka sah.
U la ïathuh ruh ba ka jingboi jong ki ksew kam dei tang hakhmat khyrdop ka KHADC hynrei ha phyllaw jong ka MDC Hostel ruh ha kaba ka la kylla kum ka ktem ki ksew bad buh jingma ïa kiba ïaid lynti.
Halor ka jingbymdon ka jinglong ryntih ha kane ka jaka sah ki MDC, u Bah Teiñwell u la kdew ruh ïa ka jingbym lehkhuid ha kane ka jaka sah bad donkam ban maramot ïa ki bynta ba dei ban maramot.
U nongïalam ka Liang Pyrshah, u Bah Titosstarwell Chyne u la pynpaw lang halor ka jingdonkam ban khmih lang ïa ka jingshngaiñ ha MDC Hostel.
U Bah Titos u la pynsngew ruh halor ki jingdonkam ka shlem treikam jong u kum u nongïalam ka Liang Pyrshah namar ki don ki jingdonkam kum ki kot sada bad kiwei kiwei ki tiar naba ka shlem treikam jong u kam dei tang ïa u hynrei ïa kiwei ruh ki para MDC.
Haba ai jubab, na ka liang u CEM u la ïathuh ba ka Executive Committee ka la ïakren ïa ka kam kaba ïadei bad ka jingdonkam DDO, hynrei hap ban twad jingmut shwa na u Accountant General ban ïashai.
Haba ïadei bad ki jingdonkam ïa ki kot bad kot sada, bad kiwei kiwei, u CEM u la ong ba mynta la mang kumba T. 10 lak na ka bynta ka printing and stationery bad kane ka jingmang ka dei ruh na ka bynta ban pyllait noh ïa ka pisa kaba sahteng ban siew sha ki supplier lane ki nongpynpoi ïa ki tiar ki tar kiba donkam.
Haba ïadei bad ka jinglong ryntih, jinglehkhuid bad jingshngaiñ ka MDC Hostel, u CEM u la pyntip ba ka Executive Committee dang shen ka la ïakren ïa kane, bad la rai ban phah lai ngut ki pulit Enforcement ban pahara ha MDC Hostel na ka bynta ka jingshngaiñ.
Halor ka jingboi ki ksew ha phyllaw bad buh jingma ïa kiba sah ha MDC Hostel, u CEM u la ong ba ka Executive Committee kan sa pyntip sha ka tnat ka Sorkar Jylla kaba khmih ïa ki ksew kynthup ka Shillong Municipal Board kaba dei ban peit ïa ki ksew lymwir ha kane ka nongbah.
