Shillong, Nailur 25
Wat la ka jingjah rngai jong ar ngut ki samla na ka thaiñ Mawngap ba kynthup ïa u Wanbok-lang Kurbah (20 snem ka rta) na Kyntoit Traw Saitkhlieh bad ka Phibankyntiew Sun (18 snem ka rta) na ka shnong Marbisu ka la ïaid sha ka 5 sngi kynthih, hynrei ki bahaïing hasem haduh mynta ki dang sah ha ka lyngngoh bad ka umdum namar kim pat ïoh jingtip satia halor jong ki.
Kitei ar ngut ki la jah na la ïing naduh ka 20 tarik mynta u bnai.
Haba U Nongsaiñ Hima u pyrshang ban ïakren bad ki bahaïing hasem jong kitei ar ngut, ki la ïathuh ba haduh mynta kim pat ïoh khubor shaei kitei ar ngut ki don wat hadien ba la ujor da ka ejahar ha Mawngap Outpost ha ryngkat ka jingïawad shnong ha kylleng ki jaka.
Katkum ka jingïathuh ki kmie jong kitei ki khynnah, ki la ong ba kitei ar ngut ki dei kiba ïa pule lang ha St. Paul’s Higher Secondary School, Marbisu bad kim don kano-kano ka jingïadei samla hynrei ki la pynsngew ha la ki kmie ba ki shu ïadei paralok bad kam shym la don ruh kano-kano ka daw ha ïing ha sem.
“Nga khlem ïoh ‘phone’ eiei, nga ïalade nga kulmar khlieh. Nga khlem mai khlem tim, nga shu knieh ïa ka ‘Mobile’ namar naduh bym don shuh ka klas ‘online’ ngim da ai lad shuh ka ‘Mobile’. Nga lap ïa ka ‘Mobile’ ha ka 20 tarik mynstep bad nga la knieh noh. Ha ïing te ka long kaba shida, ngam sngewtynnad ba kan bat ‘Mobile’ naba ka jingangnud jong nga kum ka kmie ka long ban pyndep shuwa ïa ka jingpule bad ba kan ïai ap ïa ka por namar ka dang khynnah,” la ong ka kmie ka Phibankyntiew.
Ka la ïathuh ruh ba ka jingwad kam shym la sangeh bad ki la wad ha kiba bun ki jaka haduh mynta-mynne.
“Ngi kwah tip hangno ka don, haduh mynta ngim pat lap ksai,” ka la ong.
Ka la ïathuh ruh ba ka khun jong ka, ka la wan law jaiñ skul shuwa sha ïing ha shuwa ban jah rngai ha katei ka sngi.
Haba kylli, ka la ong, “Nga sngew ba ka leit khot na ïing ne kumta hi ha shuwa ban ïa phet. Lada don kiba ïohi pyntip lem sha ngi khnang ba kan ïoh wan phai noh sha ïing.”
Kumjuh, na ka liang ka kmie u Wanboklang ka la ïathuh ba haduh mynta ym shym la ïoh jingtip eiei shaphang jong ki bad kat shaba ong ki briew, ki la leit ban wad ïa ki naduh Marpna, Kynshi, Sohïong, Umsohïong, Dam, Bhoi bad kiwei-kiwei ki jaka.
“U rah ‘phone’ tangba ka la lip…u la ïakren khatduh bad nga ha ka por 5:30 baje janmiet (20 tarik). Ngim ïoh ka jingtip kaba tikna, bun kaba bakla. Haduh mynta ngim pat ïoh jingtip shaphang jong ki,” ka la ong.
Ka la ong ruh ba ka sah ha ka umdum naba ha ïing ruh kim shym don kano-kano ka daw.
“Ngi la wan sha Bhoi, Dam, Mawphlang baroh kawei, Lyngkien, Sohïong By-pass, Marpna, Lad Umsaw, ngim shym lap ksai eiei,” la ong uwei na ki bahaïing ka Phibankyntiew.
Na ka liang ka shnong mar syn tip halor katei ka jingjia, ka la lum ïa ka jingïalang ba kyrkieh ha ka Sngi U Blei bad ka la pynlong ïa ka jingwad shnong hynrei kim shym la seisoh satia.
Ka jingjah rngai jong kitei ki samla ka la jan kot shi taïew. Ha kaba ïadei bad kane na ka liang ki bahaïing ha sem ki la kyrpad ïa ki paidbah ban ïarap lem ban pyntip sha ki lada ki ïohi ïa kitei ar ngut, ha kajuh ka por ban bat ïa ki bad shondur kumjuh ban pyntip bad phah ïa ki dur ha ki nombor – 9612679072, 8837472633 bad 6909673390.
