Chennai, Nailur 25 (UNI)
Hadien san snem, ka seng AIADMK ha Tamil Nadu ka la pynkut ïa ka jingïadei bad ka BJP bad ka la mih noh syndon na ka kynhun National Democratic Alliance (NDA).
Ïa ka rai ban pynkut ïa ka jingïadei bad ka BJP la shim ha ka jingïalang kaba la long kyrkieh hapdeng ki nongïalam ba hakhmat jong ka AIADMK nalor ki MP bad ki MLA. Ïa ka jingïalang la pynïaid da u General Secretary ka AIADMK bad Nongïalam ka Liang Pyrshah ha Tamil Nadu, u Edappadi K. Palaniswami.
Haba pule ïa ka rai kaba la shim ha katei ka jingïalang, u Deputy General Secretary ka AIADMK, u K.P. Munusamy, u la ong ba ki nongïalam ka BJP ha ka jylla, ha ka shi snem ba la dep, ki la pynbudnam khnang ïa ki nongïalam ka jylla kum u C.N. Annadurai bad ka J. Jayalalithaa, bad ki la kynthoh ruh pyrshah ïa ka rukom treikam jong ka seng.
“Da kaba sngap ïa ka jingkwah jong palat 2 klur ngut ki dkhot ka seng, la shim ïa ka rai ban pynkut ïa ka jingïadei bad ka BJP bad ban mih noh na ka NDA naduh mynta ka sngi,” la ong ka rai jong ka AIADMK.
Hadien ba la wai ka jingïalang, da ki spah ngut ki nongkyrshan ka AIADMK ki la leit sha ka shlem treikam jong ka seng na ka bynta ban lehkmen.
Ki khubor ki ïathuh ba naduh mynta ka sngi bad ha ki por ban wan, ka AIADMK ka la rai ba kan ym don jingïadei shuh bad ka BJP la ha ka ilekshon Lok Sabha ne ha jylla.
Lah ban kdew ba ka AIADMK ka la pynkhie im biang ïa ka jingïadei bad ka BJP ha shwa ka ilekshon Lok Sabha ha u snem 2019.
