Shillong, Nailur 25
Ka Sorkar Jylla ka thmu ban ai jingmyntoi ïa haduh 1 lak ngut ki khynnah lyngba ka Meghalaya Early Childhood Development Mission (MECDM), la pyntip u Myntri ka tnat Social Welfare Bah Paul Lyngdoh ha ka Lah Sngi U Blei.
Ïa kane u Bah Paul u la pyntip hadien ba la wai ka jingïalang hapdeng ka tnat Social Welfare bad ka tnat Pule Puthi, ha kaba la ïadon lang ryngkat u Myntri ka tnat Pule Puthi u Rakkam A Sangma, ki ophisar bad kiwei kiwei.
Haba kren sha ki lad pathai khubor u Bah Paul u la ïathuh ba ka jingshong ïa kane ka jingïalang ka long ban pyrkhat bad ban wad ïa ki lad lynti kumno ban pyntyllun shakhmat ïa ka MECDM na ka bynta ka jingmyntoi ki khynnah ha ka jingïatreilang bad ka tnat pule puthi.
U la pyntip ruh ba ha ka jingïalang, lyngba ka presentation na ka liang u Principal Secretary ka tnat Social Welfare u la pynsngewthuh kumno ban pynïaid shakhmat bad kumno ban pynbeit ïa ki kynrum-kynram haba ïadei bad ki jyrwit-jyrwat kiba long kum ki mawjynthut lada pyntyllun noh ïa ka MECDM.
Khnang ba kan long ka jingmyntoi ïa ki khynnah jong ka jylla, ka jingïalang ka la rai ban don da ka Draft ka ban long ka kyndon lane ka lynti ban bthah ïa kitei ar tylli ki tnat kumno ba kin ïatreilang ban pyntyllun ïa ka MECDM, la ong u Bah Paul.
U Bah Paul u la ong ka jingbym don jong kumba 1500 tylli ki shnong ïa ki Anganwadi Centre ka la long ka jingeh ha ka ban pyntreikam ïa ka MECDM. Kumta ha kane ka jingïalang la rai ban pyndonkam shwa da ki kamra jong ki skul kiba thylli ha ki shnong ki bym pat don ïa ki Aganwadi Centre.
Shuh shuh u Bah Paul u la pyntip na ka liang ka tnat ha kine shi snem ban wan, kan pyrshang ban thaw ïa 600 tylli ki anganwadi centre bad kumjuh ruh ban ai jinghikai ïa ki khynnah hapoh kine ki centre ban pynkhreh ïa ki khynnah.
