Shillong, Nailur 25
Ka Voice of the People Party (VPP) ka la thoh sha u Myntri ka tnat Social Welfare ka Jylla u Bah Paul Lyngdoh ha kaba ïadei bad ki mat ba ktah ïa ki khynnah namar ka jingduna bad dkoh treikam jong ka ophis Child Protection Services (CPS) Megha-laya kaba hap hapoh ka jingpeit jong ka tnat Social Welfare.
Ha ka shithi ba la thoh sha u Myntri Bah Paul Lyngdoh, u General Secretary ka VPP u Dr Ricky AJ Syngkon haba pyntip, u la kyrpad ba u Myntri un tuklar hi halor ki jingduna bad jingdkoh treikam ha ka ophis jong CPS, kaba la ktah ïa ka rukom treikam jong kane ka ophis.
U Dr Ricky AJ Syngkon ha kane ka shithi u la kdew ruh ïa ki katto katne ki bynta kiba ktah, ha kaba u la ong ba ka ophis jong ka CPS Meghalaya ka dei kaba la sdang bad bei da ka Sorkar Kmie ha u snem 2012 da ka jingthmu ban ïada ïa ka hok jong ki khynnah katkum ki kyndon jong ki aiñ kiba bun, kum ka Juvenile Justice (Care and Protection of Children) Act 2015, Protection of Children from Sexual Offence Act, 2012, Prohibition of Child Marriage Act, 2006, Immoral Traffic Prevention Act, 1986 bad kiwei kiwei, ha kaba ka jingnoh jingïarap pisa ka la long 90 na ka Sorkar Kmie bad 10 na ka Sorkar Jylla na ka bynta ki phra tylli ki jylla ka thaiñ shatei lam-mihngi.
“Hynrei ka la long pat kaba kyndit ban tip ba ki Child Care Institution mynta ki don hapdeng ka jingeh na ka jingtyrkhong ka pla tyngka, la haba phai ha ka liang ka jingai jingsumar, ka jingsiew bai skul ne ka bai leit bai wan, kaba la ktah ïa ki khynnah bad ki nongtrei kiba ai ka jingshakri kaba pura sha ki khynnah,” la ong une u nongïalam ka VPP.
U Dr Ricky u la ong kumba ka long mynta, ka jingïoh jingïarap ka dei beit tang na ki synñiang ba la noh da ki riewshimet, kaba dang lah ban pynneh bad pynïaid ïa kine ki Child Care Institution kiba dei jong ka Sorkar bad ban pynthikna ba ki khynnah kin ïoh ka jingbam ba man la ka sngi.
La ong ruh ba ki ophisar bad ki nongtrei kiba trei hapoh ka Child Protection Services haduh mynta kim pat shym la ïoh ïa ka tulop kaba la sah haduh saw bnai bad nalor kane, kam don satia ruh kano kano ka jingai sngewbha sha ki, wat la ki ai ïa ka jingshakri kaba pura bad janai na ka bynta ka bit ka biang jong ki khynnah.
Ka VPP ka la pynpaw ba kawei na ki daw ba la wanrah ïa ka jingeh bad dkoh treikam ka dei na ka jingbym ïoh pdiang ïa ka pisa na ka Sorkar Kmie bad kawei na ki daw jong kane, ka lah ruh ban dei ka jingbym shim jingkitkhlieh jong ka tnat ka sorkar jylla ban pynbit pynbiang ïa ki jingdonkam kiba donkam na ka bynta ban pynthikna ïa ka jingïaid beit jong ka skhim. Namarkata, ka VPP ka kyrpad ïa u Myntri ban shimkhia bad tuklar mardor halor kane ka kam kaba la ktah shi kat dei eh ïa ki khynnah bad ruh ïa ki nongtrei jong ka ophis.
