Shillong, Nailur 26
Ka Federation of Khasi Jaiñtia & Garo People (FKJGP) ha ka Sngi Ba-ar ka la leit ban khang khyrdep noh ïa kiba bun tylli ki dukan jong ki bar Jylla kiba treikam bad khaïi be-aiñ khlem da don ïa ki kot ki sla kiba biang ha ka thaiñ Keating Road.
Ha kane ka jingkhynra ba kyndit kynsan ka seng ka la lap ba bun ki dukan jong ki bar Jylla ha Keating Road ki la treikam bad plie khlem da don satia ka laisen khaïi (Trading License) bad kumjuh ka Labour License.
Ïa kane ka jingkhynra la pynlong da ka FKJGP Malki Circle ha ryngkat ka jingïadonlang ki nongïalam na ka Sengkmie bad ki nongtrei jong ka Shillong Municipal Board (SMB).
Kane ka jingkhynra ka la sdang naduh ka por mynstep bad kiba bun ki dukan kiba shah khang khyrdep ki dei ki dukan die tiar kali bad ki karkhana shna kali.
Ha kane ka jingkhynra, ka seng ka la ai ka jingmaham kaba tyngeh haba ban jur ba ka seng kan ym ailad ban don ki dukan ne ka jingleh ïa ki kam khaïi da ki bar jylla khlem da shim ïa ki jingbit bad don ïa ki kot ki sla kiba biang na ki bor ba dei peit.
Katba ka jingkhynra ka FKJGP ka dang ïaid, la wan mih ki pulit kiba la phah pynsangeh noh, ha kaba ki pulit ki la kyrpad ïa ki nongïalam ka FKJGP ba sangeh bad kiar na ka jingkhang khyrdep jubor ïa ki dukan.
Ha kane ka por, shiphang ka la mih ka nia ktien kaba jur hapdeng ki nongïalam ka FKJGP bad ki pulit bad dei tat ynda la wan tuklar da ki nongtrei ka SMB kiba la pyni da ki kot ki sla ba la shah ban khynra ba ki pulit kin sa shah ban bteng ïa kane ka jingthmu ka seng.
Ha man ki dukan kiba ka FKJGP ka la rung ban tohkit, ka la lap ba bun ki nongbylla bar Jylla ha katei thaiñ kim shym la leh ne don ïa ki labour license bad bun ruh ki dei kiba la trei la bun bun snem khlem ki kot ki sla kiba biang.
Ym tang kane, ka FKJGP ka la lap ruh ba wat kito ki dukan bar jylla kiba la don ka laisen khaïi hynrei kim shym la pynthymmai shuh ïa ki wat hadien ba la kut ka por kata naduh u snem 2010.
U Bah Wirfortis Lyngdoh Mawphlang, President ka FKJGP Malki u la ong, ka jingpynlong ïa kane ka jingkhynra ka dei hadien ba ka seng ka la ïoh pdiang ïa ki jingujor ba bun ki bar jylla kim shym la don ïa ki kot ki sla ban khaïi pateng ne ki ban pynthymmai ïa ki kot khaïi pateng ha ka ophis jong ka SMB.
U Organising Secretary ka FKJGP Sengkmie u Bah Khrawkupar Nongsiej u la ïathuh ba ha kane ka jingkhynra la shem ba bun ki bar jylla kim shym la pynthymmai ïa ki kot ki sla bad bun ki dukan ki la khang khyrdep lut haba ïoh jingtip ba ka don ka jingkhynra.
U la pynpaw ïa ka jingbynñiaw, ba kitei ki dukan kim ju pynthymmai ïa ki kot ki sla la bun snem bad ka SMB ka dei ban pynlong ïa ka jingkhynra man la ka por. “Baroh shi katta la ju ïohsngew ba ka Municipal ka ju ud ba kam ju don pisa, kumta ka dei ban pynlong ïa ka jingkhynra ha kylleng ki jaka bad kan lah ban pynmih ïa ka khajna khamtam haba bun ki bar jylla kim ju pynthymmai ïa ki kot ki sla,” u la ong.
Nalor kata, u la ong ruh ba ka seng kan sa leit ban ïakynduh ïa u Chief Executive Officer ka SMB ban phah khynra ïa ki dukan jong ki bar jylla kiba don ha ki jaka kiba hap ha ka jingkhmih jong ka Municipal bad ban jurip lang ruh ïa ka jingkyntur pud ïa ki jaka ki puta da ki bar jylla.
