Jowai, Nailur 26
Ka jingïakynad hapdeng ki Pnar bad ki Karbi ha ka thaiñ Lapangap-Tahpat ka la nang jur kat nang mih ki sngi bad shisien ka sngi ka lah ban khie ka thma hapdeng kine ar jaidbynriew lada ka Sorkar Jylla kam shim ïa ki lad ki lynti kiba dei ban tem ïa ka jingïakynad kaba mynta kaba dang long tang da ka jingïakawang maw mar kylliang.
Ha ka Sngi Ba-ar jong ka taïew, ka la don ka jingïakawang maw bad siat jri kaba mar kylliang hapdeng ki Pnar na Lapangap bad ki Karbi.
Haba ïakren bad u Waheh Shnong ka Lapangap u Bah Deimonmi Lyngdoh u la ïathuh ba ha kane ka sngi ki nongrep ka shnong Lapangap ki la leit ban jngoh ïa ki lyngkha sha pynthor hynrei ki Karbi kiba la ap lypa na shiliang pynthor ki la siat ïa ki da ki jri siat sim.
U la ïathuh ba ki nong Karbi naduh mynstep ki la ïa ap lypa sharud jong ka pynthor bad haba ki nongrep ka shnong Lapangap ki leit ban jngoh ïa ki lyngkha, ki la siat ïa ki da ki jri siat sim kaba la neh baroh shisngi.
U Bah Deimonmi u la ïathuh ba nalor ka jingkawang maw bad ka jingsiat jri, ki nong Karbi ki la pyndonkam ruh da u khnam bad ryntih ha kaba uwei u pulit ka jylla u la lait salit na u khnam ki Karbi.
U la ïathuh ba na ka liang u pulit Assam u la ïaleh ban khanglad ïa ki nong Karbi, hynrei ki Karbi kim ngeit bad ki wan tur beit sha pynthor bad da ka jingbym banse, ki nong Lapangap ruh ki la ïamih da u paidbhur.
Ka jingïasiat bad kawang maw ka la kut ha ka por 5 baje janmiet bad ki nong Lapangap ki la leit phai katba ki nong Karbi pat ki dang ïai ap beit ha katei ka jaka, la ïathuh u Waheh Shnong.
