Shillong, Nailur 26
Ka Greater Shillong Water Supply Scheme (GSWSS) phase-III kaba dei ka projek ban sam um ha kane ka nongbah kan dang shimpor ban pyndep namar ka tnat Public Health Engineering (PHE) mynta ka la donkam pisa biang sha T. 66 klur khnang ban pyndep pura ïa kane ka projek kaba la sahteng da ki phew snem mynta la kumba 13 snem naduh ba la sdang ban pyntrei.
Ïa kane ka projek kaba la wan lyngba skhim ka JNNURM jong ka Sorkar Pdeng bad kaba la kylla mynta kum ka AMRUT, ka dei kaba la buh mawnongrim da ka President barim ka ri ka Pratibha Devi Singh Patil ha Mawphlang ha ka 22 tarik Risaw, 2008.
Haduh mynta kane ka projek ka dang sahteng bad tang ki pipe um ruh ym pat lah ban tep lut ban sam um sha ki shnong ki thaw ka sor Shillong.
Haba ïakren bad u Myntri ka tnat PHE, u Marcuise N Marak u la ong ba ka kane ka projek ka la nang kiew ha ka jingmang pisa namar ka jingslem ban pyndep ïa kane ka projek.
U la ong ba mynta dang donkam pisa biang sa T.66 klur kaba dei ban mang da ka Sorkar Jylla bad lada kheiñlang naduh basdang haduh mynta, kane ka projek ka la kot sha ka T.300 klur.
Kum ban pynkynmaw, ha ka por ba u Bah Renikton Lyngdoh Tongkhar, ka Sorkar Jylla ka la mang kumba T.65 klur ban pyndep noh ïa ka GSWSS-III, hynrei ym shym la lah ban pyndep bad mynta la donkam pynban sa T.66 klur.
U la ong ba naduh basdang kane ka projek ka la sahteng namar ki daw kiba bun khamtam ka rukom pyllait pisa kaba long toit-toit bad ka jingkylla ki Myntri kiba peit ïa ka tnat PHE.
U la ong ruh ba ha ki snem ba la dep, ka PHE ka mad jingeh kam ïoh jingbit na ka PWD ban tih bad tep ïa ki pipe na ka bynta ban sam um sha kylleng ka sor Shillong.
Kumta u Marak u la ong ba lada ïaid beit ki kam bad ïoh jingbit lut yn sa lah ban pyndep noh habu Nohprah mynta u snem.
U la ong ba donkam ruh ban ïoh jingbit na ka bynta ban shna ïa ka jaka pom um (pumping station) na Wah Umïew sha ka jaka pyllang um bad ban phah sha ka treatment plant.
