Shillong, Nailur 26
Ka kurim (ba la shong khlad) jong u Bah Kmenwell Marweiñ (42 snem ka rta) – u rangbah ba shah kynnoh thombor pynmynsaw ïa kawei ka khynnah skul ha ka shnong Lawbyrtun, Eastern West Khasi Hills ka la ïathuh ba ha ka step 19 tarik mynta u bnai ha shuwa jong katei ka jingjia, utei u rangbah (Bah Kmenwell) u dang wan mih sha ïing ban wan panmap na ka.
Haba ïakren bad ‘U Nongsaiñ Hima’ ha kaba ïadei bad ka jinglong jingman u kurim jong ka, ka la ïathuh ba ki don 7 ngut ki khun bad mynta ki la ïashong khlad.
Ka la ïathuh ba u kurim jong ka u long u briew uba dih ba bam, uba lyngkot ka jingmut jingpyrkhat bad uba ju mlien ruh ban jrong kti bad ban shoh ban dat ïa ka ynda la shoh u ‘khawiang.
Kumta na ka liang ki bor shnong ki la pynïashong khlad noh shipor ïa kine ki shi kurim tat haduh ba une u briew un da kylla shuwa.
“Ngi la ïashong naduh u snem 2005, u dei u briew uba dih, u shait shoh ïa nga, tangba ngam tip ba u la leh kat haduh kane pyrshah ïa kane ka khynnah,” la ong ka kurim.
Haba kdew ba um ju don kaba kum katei ka jingmut, ka la ïathuh ba ki dei ki briew kiba shu bylla sngi katba ïoh, bad u kurim jong ka u ju wan ai hi sha ki khun ki kti.
“Ngam tip ïa ka jingmut jong u namar ngi khlem ïashong shuh. U shait shoh shait dat ïa nga, ka don ka jingsngew, ki khun ruh la heh, ïoh mih ka jingïarah kti hapdeng u kpa bad u khun te sngew lehraiñ,” ka la ong.
Haba pynsngew ba ki la ïakhlad hakhmat ka jingdonlang u Rangbah Shnong, ka la ong ha u ba kin ym shong khlad duh hynrei kan ap haduh ba un da kylla shuwa bad kan sa ïashong biang.
Haba kylli, ka la ong, “Um ju don jingmut sniew bad ha kato ka step ban sa jia kumne ruh u dang wan mih sha ïing ban wan panmap.”
Shuh shuh ka la bynrap ba ha ka por ba u wan panmap na ka, ka la ong sha u ba haba kwah wan panmap u dei ban khot lang ïa ki Rangbah Shnong bad ki bahaïing hasem namar ban shu pdiang tang ma ka shimet kan ym lah.
