Shillong, Nailur 26
U MDC ka Sohra, Bah Titosstarwell Chyne ha ka Sngi Ba-ar u la pyntikna ba un ïa aireng ha kane ka ilekshon ban wan sha ka Khasi Hills Autonomous District Council (KHADC) namar u paidbah ka konstitwensi um shym la kyntait ïa u.
“Nga la kren ha ki rynsan paidbah, nga la mih shakhmat naduh u snem 2008 ban aiti ïalade na bynta ban shakri ïa ka Sohra konstitwensi kumjuh ïa ka ri bad ka jaidbynriew ha ka jinglah katkum ka bor jong nga,” la ong u Bah Chyne haba kren sha ki lad pathai khubor.
Haba kdew ba ki paidbah ka Sohra konstitwensi kim shym la kyntait ïa u, u la pynkynmaw ba wat la ki paidbah kim shym la pynjop ïa u ha ka snem banyngkong ba u ïakhun, hynrei ki pynjop ïa u ha ka MDC bad hadien kane, ki pynjop sa ïa ka MLA, wat la u la shah rem noh ha u 2018 (kum u MLA).
“Hynrei nga khlem shongthait, kata ka mynsiem jong nga, kumba nga ong ba nga la aiti ïalade, nga shu bteng beit katba u paidbah u ibit ïa nga la kum u MLA ne MDC tangba ka jingïai bteng ka don. Ngam rieh, ngam sangeh, kata ka jingïaid jingïeng jong nga ha ka jingïakynduh bad u paidbah,” la ong u Bah Chyne.
Haba phai sha ka ilekshon MDC, u la pynsngew sha ki paidbah ba na ka liang jong u, u dang don hi ka jingangnud ban ïaid shakhmat katba dang biang dang khlaiñ ka met ka phad.
Ha kajuh ka por, haba pynshai ba um ju don ka jingsangeh hynrei tang ka jingbteng, u la ong, “Kiwei-kiwei tang shu rem shisien, kin ong katto ngam ïaleh shuh, ki don lei kiba da smai ruh ba katto la thngad thngaw, ngam hiar Sohra shuh, ki don kiba ong haduh katta ruh.”
“Ki don kiba kynnoh bad ba kren beiñ ïa ki paidbah, ki ong ba ngam ïaleh ilekshon shuh ba ki paidbah Sohra kiba biej pisa, ki da kiar ïa ki paidbah, ki pynlip ïa ki ‘Mobile’, kim ju leit shuh wat lada jia ka sngewsih, ka pang ka shitom, ka ïap ka im, kim ju mih shuh,” u la ong.
Ha kawei ka liang, u la ïathuh ba ki don ruh pat kiba kum kita kiba ong ba ynda la don ba tyndung, ba ktik mano-mano, ki khohreh ban ïaleh biang, hynrei kata baroh ka shong ha u paidbah ban bishar.
Shuh shuh haba kylli, u la ong, “Ngam don eiei ban ong halor ka jingphet seng jong kiwei namarba nga ïalade bym pat ju phet seng. Naduh ba ïakhun ilekshon, nga ïakhun beit na kajuh ka seng. Da don ha ka liang synshar ne pyrshah ruh nga shong beit, por ba long MLA ruh 5 snem nga shong ha ka liang pyrshah.”
“Wat la katta ruh, nga sngewtynnad namar nga ïoh ban kren bha hapoh ïingdorbar, ban pynsngew ïa ki mat jong ka konstitwensi bad ka ri bad jaidbynriew,” la bynrap utei u MDC.
