Shillong, Nailur 26
Ka Sorkar Jylla ka la pyntip sha ka Meghalaya High Court ba la ïohpdiang ïa ki kot ki sla na ki 30 ngut ki briew na ka bynta ban ïoh tih dewïong katkum ka juk saïan bad ka jingpeit bniah ïa ki kot ki sla ka dang ïaid ha ryngkat ka Tnat Dewïong (Ministry of Coal) jong ka Sorkar India.
Haba shong bishar halor ki mukotduma kiba ïadei bad u dewïong, ka High Court ka la pynpaw ba u Justice BP Katakey (Retired) u la dep phah ïa ka kaiphod kaba 17 halor ki kam dewïong ha ka 22 tarik Nailur, 2023. Ha kajuh ka por, u la ai sa kawei ka kaiphod sha ka High Court hadien ba ka ïingbishar ka la ai hukum ha ka 29 tarik Nailar, 2023.
Na ka liang ka High Court, haba kynthoh halor kitei ki 30 ngut kiba pan laisen ban tih dewïong, ka la pynpaw ïa ka jingkyrmen ba kan don ka jingbud ryntih ïa baroh ki kyndon kiba ïadei bad ka jingshngaiñ jong ki nongtih dewïong bad kumjuh ruh ki kyndon ban ïada ïa ka mariang.
Ha kane ka sngi, na ka liang u muktiar jong uwei na ki nongmudui u la pynpaw ba wat hadien ba ka High Court ka la ai hukum ha ka 10 tarik Nailar, 2023 ïa ka sorkar jylla ban peit kumno kiwei pat ki karkhana ki ïoh ïa u dewïong, haduh mynta ka sorkar jylla ka khlem pat ai ïa kano-kano ka kaiphod.
Na ka liang u Advocate General u la ong ba halor kane, u Justice Katakey u la pynlong ïa ka jingpeitngor bad ka sorkar ka la lap ba ki don katto-katne ki jingduna halor ka jingïoh dewïong da ki karkhana saiñ nar, karkhana shna dewbilat bad karkhana thang dewïong.
Kumta ka High Court ka la bthah ïa ka Sorkar Jylla ba kan ai ïa ka kaiphod ha ka taïew ban wan.
