Imphal, Nailur 26 (UNI)
Da ki spah ngut ki khynnah skul ha ka Sngi Ba-Ar ki la mih surok ban pyrshah ïa ka jingshah pynïap jong ar ngut ki khynnah pule ha ki ‘riew kieng atiar ba la suba ba ki dei ki Kuki.
Ka Hijam Linthoinganbi bad u Phijam Hemanjit, kiba sah ha Imphal, ki la shah rahbor ha ki briew ba la suba ba ki dei ki Kuki ha ka 6 tarik Naitung.
Ïa ka Mobile Phone jong kine ar ngut la pyndonkam da kawei ka briew kaba dei ka Kuki ha Churachandpur distrik. Palat 33 ngut ki briew, ba kynthup ïa uwei u nongthoh khubor barim, ki la jah rngai ha Manipur naduh ba la sdang ka jingïakynad ha ka 3 tarik Jymmang.
Na ka liang ka sorkar Manipur ka la aiti sha ka CBI ba kan tohkit halor ka jingjah rngai jong kitei ar ngut ki khynnah skul.
Naduh ba ki jah, ym shym la tip satia shaei kitei ar ngut ki khynnah skul ki la poi tat haduh ba ki dur ki dar jong ki, ki la mih ha ki rynsan ‘Social Media’ ha ka Lah Sngi U Blei ha kaba la pyni ba ki la shah rahbor.
U Myntri Rangbah ka Manipur, u N Biren Singh, u la ong ba ka sorkar kan sa leh da kaba tyngeh pyrshah ïa kito kiba la donkti ban pynïap ïa kitei ar ngut ki khynnah.
Halor kane ka jingshah pynïap, ki nongshong shnong ki la pynlong da ki jingïakhih ban pynrem jur ha kiba bun ki jaka. Na ka liang ki khynnah skul ruh ki la ïa mih paidbah ban pynrem bad ban dawa ba dei ban leh da kaba tyngeh pyrshah ïa kiba la donkti ban pynïap ïa kitei ar ngut. Ki la kynnoh ba ha ki dur ki dar kiba la mih paidbah, la ïohi ïa ki ‘riew kieng atiar kiba dei ki Kuki.
Ha kawei pat ka liang, ka sorkar Manipur ka la pynjari biang ïa ka aiñ ban khang ïa ka jingpyndonkam ïa ka Internet na ka bynta san sngi hadien ba ki khynnah skul ki la ïa mih sha surok ha Imphal ban pyrshah ïa ka jingshah pynïap jong kitei ar ngut ki khynnah skul kiba dei na ka jaidbynriew Meitei.
Kane ka jingkhang pyndonkam Internet ka la treikam naduh mynta ka sngi bad kan bteng haduh ka 1 tarik Risaw, 2023. Lah ban kdew ba ka sorkar ka la weng noh ïa ka jingkhang pyndonkam Internet ha ka 23 tarik Nailur jan san bnai hadien ba la khang pyndonkam ïa ka naduh ka 3 tarik Jymmang, 2023.
