Nongpoh, Nailur 26
Ha kawei ka jingjia ha ka janmiet jong ka Sngi Ba-ar, kawei kali Maruti Van kaba don ïa u nombor AS01-BP-2426 ka la pra phom hadien ka jingshah ban na ka jingtwa kynsan jong ka khyndew ha ka shnong Patharkhmah hadien ka jingther jong u ‘lapbah ba jur.
Katkum ka jingtip ba la ïoh lum, la ïathuh kane ka jingjia ka la jia ha ka por kumba 3 baje eiei janmiet ha ka por ba ka jingther jong u slap ka dang jur. La ong ruh ba katei ka kali ka dei kaba la pynïeng harud surok bad kyndit-kynsan ka la don ka jingtwa khyndew bad ka jingkhyllem jong u diengbah kaba la pynlong ïa ka katei ka kali ban pra phom.
Shuh shuh la ïoh jingtip ruh ha kane ka jingjia, ym shym la don kiba mynsaw namar ym shym la don briew satia hapoh ka kali. La ong ba na ka liang jong ki paidbah ki dang ïaleh ban khat bad weng ïa katei ka khyndew bad ki dieng kiba la khang dam ïa ka surok bad ktah shikatdei ïa ka leit ka wan jong ki paidbah lyngba katei ka surok.
