Shillong, Nailur 26
Uwei u rangbah ba la kynnoh ba u la donkti ban thombor ïa kawei ka khynnah skul la suba ba u la pynkut noh ïa la ka jong ka jingim ha u tyllai phasi hadien ka jingjah rngai na la ïing la katto katne sngi.
Ïa ka met ïap jong utei u briew ba la tip kyrteng kum u Kmanwell Mar-weiñ na ka shnong Lawbyrtun ha Eastern West Khasi Hills la lap da ki bahaïing hasem jong u na markhap ka jaka rep riewhadem hadien ba ka jingsma ka la wan beh na katei ka jaka.
La suba jur ba une u briew u la dkhat ïa la ka jingim ha u tyllai phasi da ka jinglap ïa u tyllai jyrmi ba la dkut halor uwei u dieng, uba don markhap bad kane ka nala.
Na ka liang jong ki bahaïing ki la ïathuh haba ki la wad, ki la lap pynban da ka met ïap kaba la sma bad kumta la pyntip noh sha ka bor shnong hadien kata ki bor pulit jong ka thanat Mairang ki la wan ban tohkit na kaei ka daw utei u rangbah u la khlad.
Haba ïakren bad ka Kong Tenis Marweiñ kaba dei ka hynmen jong une u rangbah ka la ong ba la lap ha ka por kumba 11 baje katba ki dang mut ban leit kheit riewhadem pynban ki la sngew ka jingsma bad hadien katto katne por la lap ïa ka metïap une u rangbah.
Katkum ka khubor na ki pulit, la ong ba une u briew u dei uba la suba donkti ha ka jingthombor ïa kawei ka samla lud ba dang 19 snem ka rta, kaba la jia ha ka 19 tarik Nailur.
La ïathuh ba kane ka samla kala mynsaw jur bha ha kane ka jingshah thombor ha une u briew uba la tied da u maw bad dung ruh da ka tari, bad ha kaba ïa kane ka samla la pynkit noh sha Shillong Civil Hospital ban pynïoh ka jingsumar.
Shuh shuh ki pulit ki ïathuh ba hadien katei ka jingjia, une u briew u la jah rngai naduh ka 19 tarik Nailur, kaba la pynsuba jur ba u donkti ban leh ïa kane ka kam bymman.
Na ka liang jong ki pulit ki la suba jur ba une u briew u la sdien phasi hi ïalade hadien ba ki la lap ïa u tyllai jyrmi ba la dkut shiteng halor uwei u dieng, uba don markhap bad kane ka nala.
Ïa ka metïap jong une u briew ki pulit ki la pynkit noh sha hospital ban pyndep ïa ka jingleh post mortem ban lap ïa ka daw tynrai jong ka jingïap.
