Shillong, Naitung 26
Ka jingdum ka jaka ïeng kali ha khlieh Ïewduh kaba don shatrai duh ka la pynlong ïa ki kynthei ba kim nud ban rung namar ka jingbym shngaiñ.
Nalor ba kane ka jaka ïeng kali ka long kaba dum la ïohi sa ka jingktieh kaba la tuid ha madan kaba la wan artad ka jingsma.
Ka jingdum kane ka jaka ïeng kali ka dei namar ba ka tnad Municipal kam shym la pyndait da ki bording kaba la pynlong ïa ki nongñiah kali ban thang da ka bording ban ïohi haba ki rung hapoh.
Ha kane ka jaka ïeng kali ki dei kiba ïeng kiba wan kamai na thaiñ Nongstoiñ, Mairang, Nongthliew, Sohïong, Krang, Nongbsap, Tyrsad, Nongspung bad Wahlang.
Namar ka jingdum palat jong kane ka jaka ka la pynlong ïa ki nongtuh ban tuh ïa ki tiar kali kiba pynïeng ha kane ka jaka.
Haba ïakren bad ki katto katne ki nongñiah kali ki ïathuh ba ka jingpynkiew ïa ka bai ïeng kali 20 tyngka man ba ki rung ha kane ka jaka ka long ban pynkhuid ïa kane ka jaka ïeng kali. Pynban kam shym la long kumta, hynrei ki dang bun ki jaboh kiba dang sah kaba la pynlong ïa ki ban hap shah ïa ka jingsma.
Kumta ki la kyrpad ïa ka sorkar ba kan buh da ki bording ban shngaiñ ïa ki nongleit wan, ban pynkhuid ïa ka ktieh namar kiba la leh stai kim nud ban rung ha jaka ka jaka ïeng kali.
Ki nongñiah kali ki la ïathuh ba hapdeng ka jingsma lada lap ka thngan kim banse ban bamja hynrei ym don ba ïohi ïa ka jingeh jong ki.
Ki la ïathuh ba mar shu sdang kem dum ka bneng, ki hap ban mih noh na kane ka jaka namar kim nud ban ieng ha ka por miet namar ba ka jaka ïeng kali ka la dum lypa wat ha ka por mynmiet ruh.
Shuh shuh ki la pynpaw ba ha ka por ba jur u slap ka um ka poi haduh khohsiew kaba long shisha kaba isaitmet namar ki jaboh ba mih na basa dohkha kaba don hajrong ka jaka ïeng kali ka tuid lut shapoh.
“Ngi sngewsih ban pyntip ba lada ngi leh stai katno katno hynrei lada poi ha khlieh Ïewduh ka kali jong nga kam ju khuid ka la dap beit da ka ktieh bad ma ngi ki draibar ruh ngi bit ktieh lang haba la hiar napoh kali” ki la ong.
Ki la pynpaw biang ba bunsien kim ïoh ïa ki nongleit nongwan namar ki kynthei da khot ban shong lypa hapoh kali kim treh ban wan namar ka dum palat bad sa ka sma, hynrei ban ap haduh ban da ïoh pali bun ki nongleit ki la phet noh.
