Shillong, Nailur:
Ka Federation of Khasi Jaiñtia & Garo People (FKJGP) haba lap ïa ka jingdon ka jingkyntur pud be-aiñ jong ki bar jylla sha ki jaka ka sorkar ha thaiñ Keating Road, ka la buh jingkylli ba balei ka sorkar ka leh matlah ha kaba ïadei bad kane ka bynta, hato don eiei sha lyndet.
Ïa kane ka jingkyntur pud da ki bar jylla, ka FKJGP ka la lap ha ka por ba pynlong ïa ka jingkhynra ïa ki kot ki sla ne Trading License bad Labour License ïa ki dukan bar jylla ha ka Sngi Ba-ar ha katei ka thaiñ.
Ha kane ka jingkhynra, ka FKJGP ka la lap ba bun ki dukan bad ki ïing jong ki bar jylla ki la kyntur wat sha ki nala bad ki surok jong ka tnat PWD naduh Keating Road sha Khyndailad.
Halor kane ka FKJGP ka la lum thup ïa ka kyrteng jong ki briew kiba donkti ban kyntur pud sha ki jaka Sorkar, ki nala bad ki surok PWD ban phah kyndang mar mar ha ki bor Sorkar.
U Secretary ka FKJGP Malki Circle, Bah Khraw Lynshing haba ïakren bad ki lad pathai khubor, u la ong ba ka seng ka la lap la bunsien ba ka Sorkar ka ju leh matlah haba phai sha ka jingkyntur pud jong ki bar jylla sha ki jaka Sorkar.
“Balei ka sorkar ka leh matlah ïa kane ka jingkyntur pud da ki bar jylla namar lada leh da ki Khasi pat, khlem ka jingmap, ki kloi ban shim khia bad leit kyndang wat ïa ki ïing ne ki dukan,” u la ong.
U Bah Khraw u la buh jingkylli la ka Sorkar Jylla ka tieng mo ban leh eiei pyrshah ïa ki bar jylla ba pynkheiñ aiñ haba kyntu ba ka Sorkar ka dei ban ñiew lang kumjuh ha kaban pynthikna ba ym dei ban leh shiliang ïa ki jaidbynriew aïu aïu ruh.
