Nongpoh, Nailur 27
Ha kawei ka jingjia kaba la paw pyrthei ha ka Sngi Balang, kawei ka longkmie kaba leit ban shim dawai khyllung na Nongpoh Civil Hospital, ka la kyndit ban lap da ki kynja phngit bilor ha ka dawai um (syrup) kaba don ïa ka kyrteng Acklogal-P ha ka por ba ka dang thmu ban pyndih ïa la ka khun.
Kumba la ïoh jingtip, la ïathuh ba katei ka longkmie lem bad katei ka khunrit, ka la leit ban shim dawai na katei ka hospital sorkar ha ka 25 tarik mynta u bnai. Na ka liang ki doktor katei ka jaka ai jingsumar ki la bthah ïa ka ba kan thied ïa katei ka dawai Acklogal-P na ka pharmacy jong katei ka jaka ai jingsumar.
La ïoh jingtip ruh ba katei ka longkmie ka la dep ban pyndih ïa la ka khun ïa katei ka dawai, hynrei ha ka sien kaba ar ba ka thmu ban pyndih biang, ynda la theh na bilor, ka lap pynban da ki kynja phngit bilor ha katei ka dawai.
Halor katei ka jingjia, ka KSU Nongpoh Circle ha ka sngi Balang ka la leit ban kynduh mardor ïa ka District Medical & Health Officer jong ka Nongpoh Civil Hospital ban ujor bad dawa ban pynlong ïa ka jingtohkit kaba bniah halor katei ka jinglap ïa kitei ki kynja phngit bilor hapoh katei ka dawai kaba la buh jingma shikatdei ïa ki nongpang kiba pyndonkam ïa kum katei ka jait dawai.
Na ka liang ka seng, ka la dawa ruh ba ki bor hospital ki dei ban pynsangeh mardor ïa ka jingai ïa katei ka jait dawai sha ki nongpang bad ban pynlong ïa ka jingtohkit haduh ban da lap shwa ïa ki jingshisha baroh. Na ka liang ka seng ka la kynnoh ruh ba bunsien ki dawai kiba la ai na ki hospital sorkar ki dei kiba tad dor bad kiba buh jingma shi kat dei ïa ka jingim jong ki nongpang kiba leit shah sumar.
Halor kane ka jingjia, ka DMHO ka la pynpaw sha ki dkhot ka seng ba kan pynsangeh shwa shipor ïa ka jingai ïa katei ka dawai bad ruh ban pynlong ïa ka jingtohkit kaba bniah halor ka jingdon jong kitei ki phngit bilor ha katei ka dawai um.
