Shillong, Nailur 27
Ka shnong Kongthong kaba don ha East Khasi Hills District ha ka Sngi Balang ka la ïohpdiang ïa ka khusnam kum ka ‘Best Tourism Village 2023’ ha ka National Tourism Award ba la ai da ka Ministry of Tourism, ka Sorkar India.
Lah ban pynkynmaw ba ka shnong Kongthong ka dei kawei na ki shnong kaba la pawnam ha satlak ka pyrthei kum ka shnong ba khot Ïawbei da ki jingkynud sur ïa la ki khun ki kti sha lum sha wah. Ïa katei ka jingïalang sam khusnam la pynlong ha Bharat Mandapam, Pragati Maidan kaba ha nongbah New Delhi bad ïa kane ka khusnam la aiti sha ka shnong Kongthong da u V Vidyavathi, IAS, uba dei u Secretary ka Ministry of Tourism, ka Sorkar India haba ai ka jingithuh ïa ka jingpyrshang ba radbah jong ka shnong ban kyntiew ïa ki kam jngohkai bad ban pynneh pynsah ïa ka riti dustur u mynbarim. Ïa kane ka khusnam la leit ban shim na nongbah Delhi da u Bah Rothell Khongsir na ka shnong Kongthong.
Ka khusnam National Tourism Awards la ai sha kiba bun ki bynta ha ka liang ka jingdon ki jaka jngohkai kiba biang, ka jingpdiang sngewbha na ka bynta kiba wan kai, bad kumjuh ruh ha ka rukom treikam jong ka sorkar jylla ha kiba bun ki liang ban kyntiew ïa ka kam jngohkai.
Ha ka juk kaba ki briew ki ju ïakren ïakhana lyngba ki mobile phone, ki video chat bad ki text message, ki nongshong shnong ka Kongthong pat ki pyndonkam da ki sur khot ïawbei ba shu kynud sur jingrwai, ban ïakhot hapdeng jong ki sha lum sha wah. Kane ka dei ka rukom ba ki la leh naduh hyndai hynthai kaba la pynlong ruh ïa kane ka shnong ban pawnam ha satlak ka pyrthei.
