Shillong, Nailur 27
U Myntri ba khmih ïa ka tnat Jngohkai Pyrthei ka jylla u Bah Paul Lyngdoh u la pyntip ba ka Meghalaya ka la sakhi ïa ka jingwan bun jong ki nongjngohkai pyrthei kiba nabar ri haba ïanujor bad ki nongjngohkai kiba dei napoh ka ri.
Haba kren sha ki lad pathai khubor ha ka sngi Balang hadien ba la wai ka jingrakhe ïa ka World Tourism Day, u Bah Paul u la ong, “Phin kyndit shisha ban tip ba ngi la pdiang bun ki nongjngohkai pyrthei kiba dei na shabar jong ka Ri India haba ïanujor bad ki nongjngohkai pyrthei kiba dei napoh ka Ri, kaba ngi la ïoh jingtip katkum ki jingkheiñ kaba ngi don.”
Shuh shuh katkum ka jingpynpaw ka jong u, ka Meghalaya ka la kylla long kum kawei na ki jaka jngohkai pyrthei bad ka jingshisha kaba la paw halor kane, ka long ba ha kane ka sngi ba la rakhe ïa ka World Tourism Day, ka Meghalaya ka la shah pynkup burom da ka khusnam ‘Best Tourism Village- Kongthong’ kaba kdew ba shano ka kam jngohkai pyrthei ka jylla ka la poi.
“Ngi la lah ban ai kam haduh 15 hajar ngut ki briew bad nalor kane, kito kiwei pat kiba la ïoh kam kan dang lah ban kiew ha ka jingkheiñ, bad kane hi ka pyni ïa ka jingkiew jong ka kam jngohkai pyrthei hapoh ka jylla,” la ong u Bah Paul.
Haba kren pat halor ki projek kiba bun kum ka Shillong Rope Way ka ban nang kyntiew shuh shuh ïa kane ka kam, u Myntri u la ong, “Ngi la dep ban ïoh lut ki jingbit kynthup na ka tnat shipai, 101, na ka tnat Khlaw bad mynta ngi la don ha ka lynti ba shen yn khot noh ïa ka EOI (expression of interest) bad ngi kyrmen ba shwa ban kut u snem, kane ka projek kan sdang noh.”
Haba kubur lada dei ba biang shuh sa ki lad ki lynti lyngba ka liengsuiñ bad rel, ka kam jngohkai kan nangkiew shuh shuh, u Myntri u la ong, “Ka jingbiang ki surok bad kiwei ki lad ki long kiba donkam hynrei kaba kham kongsan ka dei ruh ba kaba kum kano ka kam jngohkai kaba ngin kyntiew bad kane ka dei ka bynta ba mynta ngi la wanrah ïa ki khusnam kumno ban ai mynsiem ba yn dang lah ban kyntiew bad pynjur ka jingwan kai jong ki briew nabar sha Meghalaya.”
“Haba peit mynta, ka jingwan ïuh kjat jong ki nongjngohkai pyrthei shapoh ka jylla ka la kot sha ka 15 lak ngut eiei bad kumta lada ngi don ki kad liengsuiñ bad ka rel kiba biang, ka jingwan ki briew kan nang kiew shuh shuh,” u la ong.
