Shillong, Nailur 27
Ka KSU, Sengkmie ka pyntip ba ki dkhot ka KSU-WJHDU kin hiar sha Lapangap ban kyrshan ïa ki paradoh-parasnam kiba shah pyntyrha ha ki paid Karbi kiba kam jubor ïa ki lyngkha kba jong ki Khasi.
“Ki paid Khasi kumba ju long naduh ki por hyndai-hynthai ki ju rep-riang ha la ki jaka kiba kham pajih na la ka shnong ka thaw. Kumjuh, ha Lapangap ki paid Khasi ki sah ha ki shnong hynrei ki jaka rep ba long nongkynti ma ki, ki ju don sha pajih kum hapdeng khlaw,” la ong ka kyrwoh na u General Secretary ka seng, samla Donald V. Thabah ha ka kyrwoh khubor.
Haba kdew ba ki Karbi ki la shim kabu da kaba kam ba ki lyngkha kba ki Khasi ki hap hapoh u pud u sam ka Assam, u la ong ba mynshuwa ha ka por ba ki Khasi ki leit thung ïa u kba, ym don ba pyndik hynrei da la dei ka por ban ot pat, ki paidbhur Karbi ki la siat da ki jri bad ki khnam ïa ki nongrep Khasi.
Ka KSU ka ai jingïaroh ïa ki nongshong shnong ka Lapangap kiba ïeng rangbah ban ïada ïa la u pud u sam.
“Ka KSU ka kyntu ïa ki bor Sorkar ka Meghalaya ban ai jingïada bad synran ïa ki nongrep Khasi ba kin ïoh ban leit ot ïa u kba ba ki la thung shitom. Na ka liang ka KSU kan don ryngkat bad ki paid Khasi-Pnar kiba sah ha Lapangap bad kiwei-kiwei ki bynta jong ka khappud Meghalaya-Assam bad kan ym ai lad wat tang shi inshi ruh jong ka Bri U Hynñiewtrep ba kan tuid sha Assam,” la ong utei u samla nongïalam.
Shuh shuh ka seng ka kyntu ïa ki paid Karbi lem bad ki bor Sorkar Assam ban long kiba adkar bad ban ym pyndik ïa ki paid Khasi kiba leit sha la ki lyngkha.
“Ka KSU kam kwah ïa ka jingïakynad para ‘riewlum hynrei kam lah ruh ban shu peit haba ki paradoh parasnam ki shah thombor na ka por sha ka por,” u la ong.
Nalor kane, ka seng ka la kren shai ba ka Lapangap, Mukroh, Khanduli, Langpih, Sabuda, Umwang, Moolber, Moojem, Psiar, Khatkasla bad kiwei-kiwei ki shnong Khasi ki hap hapoh ka Meghalaya bad ka KAAC bad Sorkar Assam kim dei ban kam trai ïa ki.
