Shillong, Nailur:
Ka Khasi Students’ Union (KSU) East Jaiñtia Hills District Unit lyngba ka Education Cell ka la ïoh jingujor na katto-katne ki nongshong shnong ka shnong Rymbai halor ka jingbym don nonghikai ‘Science’ la shi snem kynthih ha Rymbai Government Secondary School naduh ba ka Sorkar ka la pynkynriah kam ïa ki nonghikai kiba ju don ha katei ka skul.
Kumba ka long, haduh mynta ka Sorkar kam pat lah ban thung da kiwei pat ki nonghikai ba pura ha katei ka skul bad kane ka long ka jingduhnong kaba khraw ïa ki khynnah khamtam ïa kito ki ban pynkhreh ïa ka eksamin matrik.
Ka seng ka la kyntu ïa ka tnad ba dei peit ba kan shim khia mardor halor katei ka kam khnang ba ki khynnah pule ha katei ka skul kin ïoh ïa ka jingmyntoi ba paka khamtam kito ki ban pynkhreh ïa ka matrik.
“Ka seng ka dap da ka jingsngew bynñiaw ba ki khynnah katei ka skul ki la duh noh ïa ka jinghikai ha ka sobjek ‘Science’ tang na ka daw ba ka tnad pule-puthi kam shym la shimkhia satia bad patiaw ïa ki skul kiba don sha palat sor,” la ong ka kyrwoh na ka seng.
Ka seng ka la lap ruh ba ki kamra ki la khapngiah sha ba palat pud bad kumta ka la kyntu jur ïa ka Sorkar ban shim khia mardor ban pynbiang ïa ki nonghikai ha baroh ki sobjek bad ki kamra klas ki dei ban long kiba kylluid.
Shuh shuh ka seng ka pynsngew sha ka Sorkar ba ka dei ban kyntiew kyrdan noh noh ïa ka skul sha ka Higher Secondary School namar haduh mynta ym pat don ‘Higher Secondary’ ha East Jaiñtia bad na ka liang ka seng ka tip ba ka lah don ka jingtyrwa halor katei la kumba 3 snem mynshwa.
