Shillong, Nailur 27
U Working President ka Meghalaya Pradesh Congress Committee (MPCC) Bah Pynshngaiñ N Syiem uba dei ruh u Deputy Chief Executive Member ka KHADC u la ong ba ki dak mong bad u Dr. Mukul Sangma u nongïalam barim ka Congress uba la dei mynta u nongïalam ka seng TMC kin sa jah noh ynda ka All India Congress Committee ka la bthah ban ïatreilang bad ka TMC ha Meghalaya na ka bynta ban ïakhun ïa ka ilekshon MP Lok Sabha ban long ha u snem 2024.
U Bah Pynshngaiñ u la ong biang ba lada ka AICC ka la bthah ban ïatreilang bad ka TMC ha Meghalaya ban pynkhlaiñ ïa ka kynhun Indian National Developmental Inclusive Alliance (INDIA) kin sa leh beit namar ha ka saiñpyrthei ym ju don nongshun wat lada ki MLA kiba dei na ka TMC ki dei kiba mih na ka seng Congress.
U la pynpaw ba lada ka AICC ka la bthah ïa ka MPCC ban ïatreilang bad ka TMC ha Meghalaya na ka bynta ka ilekshon MP Lok Sabha ki kloi namar ha ka ilekshon ym don nongshun ban ïatreilang bad u Dr. Mukul Sangma ruh.
“Ynda la ïoh ka jingbthah na ka AICC ngin hap shong shwa ïa ka jingïalang jong ka Congress ha Meghalaya hadien kata ngin sa ïa shong bad ki nongïalam ka TMC” u la ong. Haba kylli kumno ka Congress ka lah ban ïatreilang bad ka TMC haba u Dr. Mukul Sangma u la dep mih na Congress, u Bah Pynshngaiñ u la pynpaw ba ha ka saiñpyrthei ym don ka bym lah, kan long beit.
Ha kajuh ka por u la pynshai ba watla ka Congress ka ïatreilang bad ka NPP ha KHADC hynrei haduh mynta ki paidbah ki dang shaniah ïa ka Congress.
U Bah Pynshngaiñ u la kam ruh ba ha ka ilekshon MLA ba dang shu dep um shym la ïakhun bad u kyrtong VPP ha Pynthorumkhrah konstitwensi hynrei u ïakhun bad ka BJP bad mynta ka kynti ruh un nym ïakhun bad ka seng VPP. U la ong ba ka jingjop ilekshon ka shong ha ka seng, nangta ha ka jinglong u kyrtong bad ki bun jait ka rukom treikam.
Halor ka jingtrei shitom u Bah Ardent ban pynsngewthuh ïa ki paidbah, u Bah Pynshngaiñ u la ong biang ba baroh ki nongïalam ki seng saiñpyrthei ki hap ban trei shitom.
Kum ban shu pynkynmaw ka jingphet noh u Dr. Mukul Sangma na ka seng Congress ka dei hadien ba ka AICC ka la thung ïa u Bah Vincent Pala kum u President ka MPCC.
Nangta ha ka por ba u Bah Pynshngaiñ u dang dei u MLA bad MDC ka Congress u la dei uwei u nongïakhun pyrshah ïa u Dr. Mukul Sangma ha ka por ba u dang bat kum u Myntri Rangbah ka jylla.
