Nongpoh, Nailur 27
Ka jingmih ki jingkulmar bad huri-hura na ka kam ïakob khwai dohkha hapdeng ki rawon kam dei shuh kaba dang thymmai, hynrei kaba la ju jia na ka por sha ka por. Kumta ha ka Sngi Balang kane kajuh jingkulmar ka la paw pyrthei biang ha ka jingïakob khwai dohkha ba la pynïaid da u Bah O Lapang bad Bahrit Mawnai lem bad ka kynhun ha ka pung jong ka RRTC kaba don ha Umran Niangbyrnai.
Katkum ka khubor kaba la ïoh lum, la ïathuh ba kane ka la jia tang khyndiat por hadien ka jingsdang jong ka jingïakob kaba la pynlong naduh ka por 9 baje mynstep haduh 3 baje janmiet. Na ka liang ki rawon kiba la leit ban ïashim bynta ha katei ka jingïakob khwai ki la kynnoh ba uwei napdeng ki nongkhwai u la sei ïa ka dohkha kaba la suba ba la shu rah nabar bad kaba la ïap lypa ban leit thew bad kynnoh ruh ba u la ban donkti lang bad ki nongpynïaid.
Ha katei ka jingsuba leh buit tuh da utei u nongkhwai, kiwei pat ki rawon ki la khie bitar bad pyrshah jur kat haduh ba ka la don ruh ka jingktah kti pyrshah ïa utei u briew uba la suba ban leh ïa katei ka kam buit tuh. Na ka liang ki nongpynïaid ha kaba nyngkong ki la pyrshang ban ïada ïa utei u briew, hynrei namar ka jingkhie bitar jong ki paidbah rawon, ka la pynlong ïa ki ruh ban hap phet krad na katei ka jaka. Na ka liang ki pulit ka thanat Umsning hadien ka jingïoh khubor halor ka jingjur jong katei ka jingkulmar, ki la hiar wut-wut sha katei ka jaka ïakob khwai bad rah noh ïa utei u briew uba la suba leh buit tuh ban ïada na ka jingshah shoh shah bom ha ki paidbah rawon.
Nangta shuh shuh la ïoh jingtip ruh ba ha ka jingtohkit ki pulit, utei u briew u la phla ruh ba u la leh shisha ïa katei ka kam da kaba rah ïa ka dohkha ryngkat ka jingsuhbuit lang bad kiwei pat ki paralok jong u da ka jingthmu ïoh ïa ka khusnam pisa jong katei ka jingïakob kaba long T.10 lak ïa uba nyngkong, T.4 lak ïa uba wan ba ar, bad T.2 lak ïa uba wan ba lai ryngkat kiwei kiwei de ki khusnam pisa.
Halor katei ka jingiaklumar, na ka liang ki rawon kiba la ïashim bynta ha katei ka jingïakob khwai, ki la dawa ba ki nongpynïaid ki dei ban pynphai lut ïa baroh ka pisa bai tiket kaba ki la thied ha ka dor kaba T.2000 shi ryngwiang, uwei u khwai.
